سوات کے علاقے کبل میں تھانے کے مرکزی گیٹ کے سامنے مبینہ خودکش دھماکا ہوا ہے جس کے نتیجے میں متعدد پولیس اہلکار اور شہری زخمی ہو گئے، جبکہ جانی نقصان کا اندیشہ ظاہر کیا جا رہا ہے۔
ابتدائی اطلاعات کے مطابق بروز اتوار کبل میں دھماکا اس وقت ہوا جب مقامی شہری علاقے میں امن کے قیام کے لیے منعقدہ امن مارچ میں شریک تھے۔ ذرائع کے مطابق امن مارچ میں موجود ایک افغان خودکش بمبار نے خود کو دھماکے سے اڑا لیا۔
واقعے کے فوراً بعد امدادی ٹیمیں اور قانون نافذ کرنے والے ادارے موقع پر پہنچیں اور علاقے کو گھیرے میں لے کر شواہد اکٹھے کرنا شروع کر دیے۔ انتظامیہ کا کہنا ہے کہ معاملے کی مزید تحقیقات جاری ہیں اور حتمی تفصیلات بعد میں جاری کی جائیں گی۔
دوسری جانب سکیورٹی فورسز کی ایک اور کارروائی میں ڈرون حملے کے نتیجے میں کالعدم تحریک طالبان پاکستان کے ضلع اورکزئی کے لیے نامزد شیڈو گورنر معاویہ اورکزئی کی ہلاکت کی اطلاع ہے۔ کالعدم تنظیم کے حامی ذرائع نے بھی اس کی موت کی تصدیق کی ہے، تاہم آزاد ذرائع سے حتمی تصدیق کا عمل جاری ہے۔
علاوہ ازیں، افغانستان کے علاقے سپیرہ سے موصولہ اطلاعات کے مطابق مجلسِ عسکری گروپ کے سربراہ کمانڈر اختر محمد عرف خلیل کی ہلاکت کا بھی دعویٰ کیا جا رہا ہے۔ رپورٹ کے مطابق مذکورہ کمانڈر اپنے ساتھیوں کے ہمراہ مقیم تھا، تاہم مقامی ذرائع سے خبر کی حتمی تصدیق ہونا باقی ہے۔
دریں اثناء، ہنگو پولیس پر ہونے والے دہشت گرد حملے کا مبینہ ماسٹر مائنڈ بھی مارا گیا ہے، جسے سکیورٹی ذرائع کی جانب سے ہنگو حملے کا بدلہ قرار دیا جا رہا ہے۔