خیبرپختونخوا: لکی مروت میں سکیورٹی فورسز نے انٹیلی جنس اطلاعات کی بنیاد پر کارروائی کرتے ہوئے فتنۃ الخوارج کے متعدد ٹھکانوں کو تباہ کر دیا ہے، جبکہ آپریشن کے دوران کئی دہشت گرد ہلاک اور متعدد زخمی ہو گئے۔
سکیورٹی ذرائع کے مطابق عزمِ استحکام وژن کے تحت ملک بھر میں دہشت گردوں کے خلاف انٹیلی جنس بیسڈ آپریشنز کا سلسلہ بلا تعطل جاری ہے۔ اسی سلسلے میں لکی مروت میں کی گئی مؤثر کارروائیوں کے دوران خوارج کے ٹھکانوں کو نشانا بنایا گیا جہاں متعدد دہشت گرد انجام کو پہنچے۔
ذرائع نے بتایا کہ ہلاک ہونے والے دہشت گردوں کے قبضے سے بھاری مقدار میں جدید اسلحہ، گولہ بارود اور دیگر جنگی سامان بھی برآمد کر لیا گیا ہے، جبکہ فورسز کی سخت کارروائی کے نتیجے میں کئی خوارج شدید زخمی بھی ہوئے۔
سکیورٹی ذرائع کا کہنا ہے کہ تمام تر آپریشن کے دوران عام شہریوں کے جان و مال کے تحفظ کو مکمل طور پر یقینی بنایا گیا اور مقامی آبادی کو کسی قسم کا نقصان نہیں پہنچنے دیا گیا۔ سکیورٹی فورسز نے عزم کا اعادہ کیا ہے کہ خیبرپختونخوا میں پائیدار امن کے قیام اور دہشت گردی کے مکمل خاتمے تک یہ آپریشنز جاری رہیں گے۔
دیکھیے: خیبر پختونخوا میں سکیورٹی فورسز کی بڑی کارروائی، 10 عسکریت پسند ہلاک
