باجوڑ میں 11 جولائی کو سکیورٹی فورسز کے کامیاب آپریشن کے دوران ہلاک ہونے والے دوسرے دہشت گرد کی شناختی معلومات سامنے آ گئی ہیں۔ رپورٹ کے مطابق مارا جانے والا دہشت گرد افغان شہری تھا، جس کی شناخت احمد مخلص عرف معتصم ولد قاری میر زمان کے نام سے ہوئی ہے۔
تحقیقاتی رپورٹ کے مطابق ہلاک دہشت گرد کا تعلق افغانستان کے صوبہ ننگر ہار کے ضلع حصارک کے گاؤں لاہور خيلو سے تھا۔
سکیورٹی ذرائع کے مطابق مذکورہ دہشت گرد خطے میں متعدد تخریبی کارروائیوں اور سیکورٹی فورسز پر حملوں میں ملوث رہا تھا، جس کی لاش کی حتمی شناخت کا عمل مکمل کر لیا گیا ہے۔
اس واقعے سے قبل بھی پاکستان میں ہونے والی متعدد دہشت گردانہ کارروائیوں اور خودکش حملوں میں افغان شہریوں کی شمولیت کے واضح اور ناقابلِ تردید شواہد سامنے آتے رہے ہیں۔
پاکستان میں دہشت گردی کی حالیہ کارروائیوں میں افغان شہریوں کی مسلسل شمولیت کے شواہد سامنے آ رہے ہیں۔ سکیورٹی اداروں کی تحقیقات کے مطابق مختلف آپریشنز میں ہلاک ہونے والے متعدد دہشت گردوں کی شناخت افغانستان کے مختلف صوبوں سے تعلق رکھنے والے افراد کے طور پر ہوئی ہے، جس سے سرحد پار دہشت گرد عناصر کی موجودگی اور ان کے کردار سے متعلق خدشات مزید تقویت پاتے ہیں۔
سرکاری اعداد و شمار کے مطابق پاکستان میں دہشت گرد تنظیموں کے ساتھ سرگرم رہتے ہوئے 300 سے زائد افغان شہری مارے جا چکے ہیں، جبکہ صرف 2025 کے دوران انسدادِ دہشت گردی کی مختلف کارروائیوں میں 245 سے زیادہ تصدیق شدہ افغان شہری ہلاک کیے گئے۔ حالیہ شناخت بھی اسی سلسلے کی ایک کڑی قرار دی جا رہی ہے، جو پاکستانی سرزمین پر سرگرم دہشت گرد نیٹ ورکس میں افغان شہریوں کی موجودگی کی نشاندہی کرتی ہے۔
ریاست پاکستان کے پاس ان تمام واقعات کے مکمل قانونی ثبوت موجود ہیں، جن میں افغان سرزمین اور وہاں کے شہریوں کا پاکستان مخالف سرگرمیوں میں استعمال ہونا ثابت ہوتا ہے۔
انہی سکیورٹی خدشات اور ملکی امن و امان کی صورت حال کو مدنظر رکھتے ہوئے حکومتِ پاکستان نے غیر قانونی طور پر مقیم غیر ملکیوں بالخصوص افغان شہریوں کی ان کے وطن واپسی کا عمل شروع کر رکھا ہے۔
ریاستی موقف ہے کہ بغیر سفری دستاویزات کے قیام پذیر افراد ملکی سلامتی کے لیے خطرہ بن سکتے ہیں، لہٰذا تمام غیر قانونی تارکینِ وطن کی باقاعدہ اور محفوظ طریقے سے واپسی کو یقینی بنایا جا رہا ہے۔
دیکھیے: باجوڑ آپریشن میں افغان عسکریت پسند کی ہلاکت، طالبان ٹی ٹی پی گٹھ جوڑ بے نقاب
