خیبر پختونخوا کے ضلع باجوڑ کے سرحدی اور دور افتادہ علاقے گھاکھی میں پاک فوج کی جانب سے مقامی آبادی کی فلاح و بہبود کے لیے ایک فری میڈیکل کیمپ کا انعقاد کیا گیا، جس سے سینکڑوں شہری مستفید ہوئے۔
یہ میڈیکل کیمپ گھاکھی، کوہی، گھونڈئی، تلی، چلارگام اور بٹملئی کے دیہات کے لیے قائم کیا گیا تھا۔ کیمپ میں ماہر ڈاکٹروں نے جنرل میڈیسن، سرجری، آنکھوں کے امراض، امراضِ نسواں، نفسیات اور فزیوتھراپی کے شعبوں میں 876 افراد کا مفت معائنہ کیا، جن میں 320 خواتین، 301 بچے اور 255 مرد شامل ہیں۔ تمام مریضوں کو مفت ادویات اور صحت سے متعلق ضروری معلومات بھی فراہم کی گئیں۔
دور افتادہ علاقے کی دشوار گزار تحویل میں معیاری علاج اور ادویات کی مفت دستیابی پر مقامی مشران، معززین، جوانوں اور مریضوں نے پاک فوج کے اس جذبہ خیر سگالی کا شاندار الفاظ میں اعتراف کیا۔
علاقائی مشران اور نوجوانوں نے فوجی قیادت اور شعبہ طب سے وابستہ اہلکاروں کے اس طبی اقدام پر ان کا تہہ دل سے شکریہ ادا کیا اور امید ظاہر کی کہ آئندہ بھی ایسے فلاحی اقدامات جاری رہیں گے۔
خیبر پختونخوا اور بلوچستان کے عوام کی سلامتی کے لیے پاک فوج کے جوان روزِ اول سے اپنی جانوں کے نذرانے پیش کر رہے ہیں۔ سرحدوں پر پہرہ دینے کے ساتھ ساتھ پاک فوج ان علاقوں میں عوامی فلاح اور طبی امداد کو یقینی بنا کر شہریوں کے تحفظ اور بہبود میں پیش پیش ہے۔
دیکھیے: پاکستان سے اختلافات ختم کیا جائے، ورنہ افغانستان تنہا رہ جائے گا: افغان وزیر