اقوامِ متحدہ کی جنرل اسمبلی کے اجلاس میں بھارتی مندوب کی جانب سے پاکستان کے اندرونی معاملات اور قومی اداروں کے خلاف ہرزہ سرائی نے ایک نئی بحث چھیڑ دی ہے۔ سیاسی و دفاعی مبصرین نے اس عمل کو پی ٹی آئی اور بھارتی پروپیگنڈے کا واضح گٹھ جوڑ قرار دیا ہے۔
مبصرین کے مطابق اقوامِ متحدہ میں بھارتی فرسٹ سیکرٹری پیٹل گہلوٹ نے بعینہ وہی الفاظ استعمال کیے جو پاکستان تحریک انصاف ملکی و بین الاقوامی فورمز پر دہراتی رہی ہے۔ سیاسی حلقوں کا کہنا ہے کہ پی ٹی آئی کا مؤقف اب بھارتی ایوانوں اور فورمز میں گونج رہا ہے۔
دفاعی تجزیہ کاروں نے نشاندہی کی ہے کہ بھارت، پاکستان کے عسکری اداروں اور آئینی ترامیم کے خلاف زہر افشانی کے لیے پی ٹی آئی کے بیانیے کا سہارا لے رہا ہے۔ یہ عمل ثابت کرتا ہے کہ دونوں اطراف سے ایک دوسرے کے موقف کی پشت پناہی کی جا رہی ہے۔
شدید عوامی اور سیاسی ردِعمل
عوامی اور سیاسی حلقوں نے اس گٹھ جوڑ پر شدید غم و غصے کا اظہار کیا ہے۔ مبصرین کا ماننا ہے کہ بیرونی محاذ پر ملکی ساکھ کو نقصان پہنچانے کے لیے اندرونی سیاسی بیانیے کا استعمال افسوسناک ہے، جس کا مقصد محض قومی سلامتی کے اداروں کو متنازع بنانا ہے۔