پاکستان تحریک انصاف کے سینئر رہنما شوکت یوسفزئی نے موجودہ سیاسی حالات کے پیش نظر اسلام آباد کی جانب احتجاج اور لانگ مارچ کا فیصلہ فوری طور پر مؤخر کرنے کی اپیل کر دی ہے۔
شوکت یوسفزئی نے پی ٹی آئی کے چیئرمین بیرسٹر گوہر، سیکریٹری جنرل سلمان اکرم راجہ، وزیراعلیٰ خیبرپختونخوا اور دیگر قائدین کے نام ایک خط ارسال کیا ہے۔ انہوں نے خط میں مؤقف اختیار کیا کہ موجودہ حالات میں اسلام آباد کا رخ کرنا پارٹی مفاد میں نہیں ہوگا۔
انہوں نے کہا کہ کارکنوں کے خلاف ممکنہ کریک ڈاؤن اور کسی بھی جانی نقصان سے بچنے کے لیے احتجاج مؤخر کرنا ناگزیر ہے۔ ان کا کہنا تھا کہ پارٹی کو اس وقت باہمی مشاورت اور سنجیدہ مذاکرات کا راستہ اپنانا چاہیے۔
شوکت یوسفزئی کا کہنا تھا کہ بانی پی ٹی آئی عمران خان کی رہائی سمیت جماعت کے تمام مطالبات جائز ہیں۔ تاہم، موجودہ حالات میں پرتشدد تصادم کے نتیجے میں پارٹی پر پابندی عائد ہونے کا شدید خدشہ موجود ہے۔
شوکت یوسفزئی نے خط کے اختتام پر واضح کیا کہ اگر قیادت نے ان کی تجاویز مسترد کر کے احتجاج کا فیصلہ برقرار رکھا، تو وہ پارٹی کے ایک وفادار رکن کی حیثیت سے احتجاج میں ضرور شریک ہوں گے۔
دیکھیے: افغان سرزمین سے دہشت گردی ہوئی تو بھرپور جواب دیں گے، وزیر اطلاعات