سکیورٹی فورسز نے بلوچستان اور خیبر پختونخوا میں کارروائیاں کرتے ہوئے 4 دہشت گردوں کو ہلاک کر دیا۔
سکیورٹی ذرائع کے مطابق بلوچستان کے ضلع سہراب کے علاقے مال مدرسہ کے قریب دہشت گردوں کی موجودگی کی اطلاع پر کارروائی کی گئی، جہاں فائرنگ کے تبادلے میں ایک دہشت گرد مارا گیا جبکہ دوسرا فرار ہوگیا۔ ہلاک دہشت گرد کے قبضے سے اسلحہ اور موٹر سائیکل بھی برآمد کی گئی۔
دوسری جانب خیبر پختونخوا کے شمالی وزیرستان میں میر علی اور گردونواح میں سکیورٹی فورسز نے انٹیلی جنس بنیادوں پر کارروائی کی، جس کے دوران 3 دہشت گرد ہلاک ہوئے۔ کارروائی میں ہلاک دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا۔
سکیورٹی ذرائع کے مطابق فورسز نے میر علی اور گردونواح میں دہشت گردوں کے ٹھکانوں کو بھی نشانہ بنایا جبکہ میر علی بازار کے قریب راشن سے لدے ٹرک کو روکنے کی دہشت گردوں کی کوشش ناکام بنا دی گئی۔
سکیورٹی فورسز کا کہنا ہے کہ ملک سے دہشت گردی کے خاتمے اور پائیدار امن کے قیام کے لیے کارروائیاں جاری رہیں گی۔
دیکھیے: پاکپتن میں دہشت گردی کا بڑا منصوبہ ناکام، ٹی ٹی پی کا اہم کارندہ گرفتار