وفاقی وزیر اطلاعات و نشریات عطا اللہ تارڑ نے کہا ہے کہ خیبر پختونخوا میں تحریک انصاف کی حکومت امن و امان، تعلیم اور انفرااسٹرکچر سمیت مختلف شعبوں میں بہتری لانے میں ناکام رہی ہے، جبکہ 4 اکتوبر کو پی ٹی آئی کے احتجاج کے حوالے سے ان کا کہنا ہے کہ یہ احتجاج نہیں ہوگا۔
ایچ ٹی این سے خصوصی گفتگو کرتے ہوئے وفاقی وزیر اطلاعات عطا اللہ تارڑ نے کہا کہ گورننس میں ہمیشہ بہتری کی گنجائش رہتی ہے، وقت آنے پر سب کچھ سامنے آ جائے گا۔
ایچ ٹی این کے سوال پر عطا اللہ تارڑ نے خیبر پختونخوا میں پی ٹی آئی کی صوبائی حکومت کی کارکردگی پر تنقید کرتے ہوئے کہا کہ تحریک انصاف صوبے میں امن قائم کرنے میں ناکام ہوچکی ہے۔ ان کے بقول تعلیم سے لے کر انفرااسٹرکچر تک کوئی بھی شعبہ ایسا نہیں جس میں بہتری لائی گئی ہو۔
لانگ مارچ پر عطا تارڑ کا مؤقف
ایچ ٹی این کے صحافی کے سوال پر کہ کیا تحریک انصاف کا 4 اکتوبر کو احتجاج ہوگا؟ عطا اللہ تارڑ نے کہا کہ پی ٹی آئی کا احتجاج نہیں ہوگا۔
وفاقی وزیر اطلاعات نے کہا کہ تحریک انصاف سیاسی طور پر کمزور ہے اور اس کے اندر بھی اختلافات موجود ہیں، اس لیے 4 اکتوبر کو مارچ نہیں ہوگا۔
تاہم عطا اللہ تارڑ نے کہا کہ اگر پی ٹی آئی احتجاج کے لیے آتی ہے تو حکومت کی تیاری بھی مکمل ہے۔
سرفراز بگٹی کی کارکردگی
ایچ ٹی این سے خصوصی گفتگو میں بلوچستان کی صورتحال پر بات کرتے ہوئے عطا اللہ تارڑ نے کہا کہ وزیراعلیٰ بلوچستان سرفراز بگٹی اچھا کام کر رہے ہیں۔
انہوں نے کہا کہ آخری دہشت گرد تک پاک فوج کے آپریشن جاری رہیں گے اور دہشت گردوں کے لیے بلوچستان کی زمین تنگ کردی جائے گی۔
وفاقی وزیر اطلاعات نے کہا کہ دہشت گردی کے خلاف کارروائیاں جاری رہیں گی اور ریاست دہشت گرد عناصر کے خلاف اپنی کارروائیاں جاری رکھے گی۔