اسلام آباد: وفاقی وزیر داخلہ محسن نقوی نے کہا ہے کہ نئے صوبوں کا مشن ضرور کامیاب ہوگا۔
محسن نقوی نے ایچ ٹی این سے خصوصی گفتگو کرتے ہوئے نئے صوبوں کے حوالے سے سوال پر کہا کہ نئے صوبوں کا مشن ضرور کامیاب ہوگا۔
صحافی کی جانب سے 4 اکتوبر کے حوالے سے سوال کیے جانے پر محسن نقوی نے جواب وزیر مملکت برائے داخلہ طلال چوہدری کی جانب موڑتے ہوئے کہا کہ اس سوال کا جواب طلال چوہدری سے لیں۔ اس موقع پر طلال چوہدری نے کہا کہ آپ کو بعد میں بتائیں گے۔
یاد رہے کہ گزشتہ روز صدر مملکت آصف علی زرداری سے وزیر داخلہ محسن نقوی نے کراچی میں اہم ملاقات کی، جس میں صوبوں کی تقسیم سے متعلق بھی گفتگو ہوئی۔
ذرائع کے مطابق ملاقات کے دوران ملک کی سیاسی و انتظامی صورتحال کے ساتھ نئے صوبوں اور صوبوں کی تقسیم پر بھی بات ہوئی، تاہم صدر زرداری کی جانب سے اس معاملے پر کوئی دوٹوک مؤقف سامنے نہیں آیا کہ صوبے بننے چاہییں یا نہیں۔
صدر مملکت آصف علی زرداری سے ملاقات کے بعد وزیر داخلہ محسن نقوی کی نئے صوبوں سے متعلق گفتگو نے معاملے کو مزید اہم بنا دیا ہے۔ ماہرین کے مطابق محسن نقوی کا یہ بیان اس معاملے پر حکومت کے اندر جاری مشاورت اور ممکنہ پیش رفت کی جانب اشارہ کرتا ہے۔
دیکھیے: دبئی سے تل ابیب جانے والی پرواز میں ہائی جیکنگ سگنل، پائلٹس زیرِ حراست