نئے صوبوں کے مطالبے کے معاملے پر صوبہ ہزارہ تحریک نے ایک بار پھر عوامی رابطہ مہم شروع کرنے کا اعلان کر دیا ہے۔ تحریک کے چیئرمین اور وفاقی وزیر مذہبی امور سردار محمد یوسف کے مطابق ہری پور، بٹگرام اور کراچی میں کنونشنز منعقد کیے جائیں گے۔
سردار محمد یوسف نے اسلام آباد میں سینیٹر طلحہ محمود کی رہائش گاہ پر تحریک کی سینئر قیادت کے اجلاس کے بعد گفتگو کرتے ہوئے بتایا کہ 4 اکتوبر کو ہری پور، 11 اکتوبر کو بٹگرام جبکہ 18 اکتوبر کو کراچی میں صوبہ ہزارہ کنونشن ہوگا۔
انہوں نے کہا کہ صوبہ ہزارہ تحریک اس سے قبل بھی ملک کے مختلف علاقوں میں جلسے، جلوس اور ریلیاں کر چکی ہے۔ ان کے مطابق خیبر پختونخوا اسمبلی تین مرتبہ صوبہ ہزارہ کے قیام کی قرارداد منظور کر چکی ہے جبکہ سینیٹ اور قومی اسمبلی میں بھی صوبہ ہزارہ سے متعلق بل موجود ہے۔
سردار محمد یوسف کا کہنا تھا کہ تحریک اب دوبارہ عوام سے رجوع کر رہی ہے کیونکہ ان کے مطابق صوبہ ہزارہ کے قیام کے لیے عوامی حمایت حاصل ہے۔
سینیٹر طلحہ محمود نے کہا کہ این ایف سی ایوارڈ مرکز سے صوبوں تک تو جاتا ہے لیکن وسائل نچلی سطح تک نہیں پہنچتے۔ ان کے مطابق 4 اکتوبر کو ہری پور میں ہونے والے کنونشن میں سول سوسائٹی، علما، طلبہ اور عوام کی بڑی تعداد شرکت کرے گی۔
تحریک کے رہنما امتیاز عباسی نے کہا کہ صوبہ ہزارہ خطے کے عوام کی امیدوں کا مرکز ہے اور صوبہ بننے کی صورت میں سیاحت کو بھی فروغ مل سکتا ہے۔
مرکزی کوآرڈی نیٹر پروفیسر سجاد قمر نے کہا کہ صوبہ ہزارہ تحریک نے بھرپور عوامی رابطہ مہم چلانے کا فیصلہ کیا ہے۔ انہوں نے بتایا کہ ہری پور کے بعد بٹگرام اور پھر کراچی میں عوامی اجتماعات منعقد کیے جائیں گے۔
بریگیڈیئر (ر) شہزاد اعوان نے کہا کہ چھوٹے صوبے وفاق کو مضبوط کریں گے اور اس معاملے کو مزید طول نہیں دینا چاہیے۔
صوبہ ہزارہ تحریک کی جانب سے نئے صوبے کے مطالبے پر دوبارہ عوامی رابطہ مہم کا اعلان ایسے وقت میں سامنے آیا ہے جب پاکستان میں نئے صوبوں اور انتظامی یونٹس کے قیام سے متعلق بحث بھی جاری ہے۔
دیکھیے: دبئی سے تل ابیب جانے والی پرواز میں ہائی جیکنگ سگنل، پائلٹس زیرِ حراست