بلوچستان کے ضلع قلعہ سیف اللہ میں سکیورٹی فورسز کے انٹیلیجنس بیسڈ آپریشن کے دوران فتنہ الخوارج کا کمانڈر عادل شاہ عرف درویش ہلاک ہو گیا۔ سکیورٹی ذرائع کے مطابق کارروائی آپریشن ردالفتنہ 3 کے تحت کی گئی۔
ذرائع کے مطابق عادل شاہ دسمبر 2020 سے فتنہ الخوارج سے وابستہ تھا اور 2024 سے گروہ کے مالی معاملات کی نگرانی کر رہا تھا۔
سکیورٹی ذرائع کا کہنا ہے کہ ہلاک کمانڈر غیر مقامی دہشت گردوں کو ژوب، شیرانی اور شعبان میں رہائش فراہم کرنے میں مدد کرتا تھا۔ وہ 2022 اور 2023 سے سکیورٹی فورسز پر حملوں اور اغوا برائے تاوان کی کارروائیوں میں بھی ملوث رہا۔
ذرائع کے مطابق عادل شاہ کے خلاف انسداد دہشت گردی کی عدالتوں میں 19 مقدمات درج تھے، جبکہ اس کے سر کی قیمت 25 لاکھ روپے مقرر کی گئی تھی۔
