پاکستان، ترکیہ، قطر اور انڈونیشیا کے درمیان بدر مفاہمتی یادداشت خطے میں دفاعی تعاون کو نئی جہت دینے کی جانب اہم پیش رفت ہے۔ اس کے تحت چاروں ممالک دفاعی صنعت، ٹیکنالوجی کی منتقلی، مشترکہ پیداوار اور فوجی تربیت کے شعبوں میں تعاون کو وسعت دیں گے۔
ترک نشریاتی ادارے ٹی آر ٹی ورلڈ کی ایک رپورٹ کے مطابق 21 اکتوبر کو دوحہ میں شروع ہونے والا یہ چار ملکی تعاون علاقائی سلامتی کے لیے ایک نئے ماڈل کی حیثیت رکھتا ہے۔ اس کا مقصد رکن ممالک کی دفاعی صلاحیتوں کو بہتر بنانے کے ساتھ دفاعی صنعت میں مشترکہ منصوبوں کو فروغ دینا ہے۔
بدر معاہدہ کی اہمیت اس بات میں ہے کہ یہ روایتی دفاعی معاہدوں سے ہٹ کر دفاعی صنعت اور فوجی تعلقات کو ایک ہی فریم ورک میں آگے بڑھاتا ہے، تاہم اس کے تحت رکن ممالک ایک دوسرے کے دفاع کے لیے فوجی کارروائی کے پابند نہیں ہوں گے۔
رپورٹ کے مطابق بدر معاہدہ اور مکہ مشترکہ دفاعی معاہدہ ایک دوسرے کے متبادل نہیں بلکہ تکمیلی فریم ورک ہیں۔ دونوں مختلف علاقائی سلامتی کی ضروریات کو پورا کرتے ہیں، جبکہ پاکستان اور ترکیہ دونوں میں مرکزی کردار ادا کر رہے ہیں۔
اس تعاون کی ضرورت ایسے وقت میں محسوس کی جا رہی ہے جب امریکہ اور ایران کے درمیان طویل کشیدگی کے باعث خلیجی خطے کے بنیادی ڈھانچے، توانائی کی تنصیبات اور سمندری تجارتی راستوں کو خطرات لاحق ہیں۔ ایسے حالات میں علاقائی ممالک دفاعی تعاون کے مزید ذرائع اور تزویراتی لچک پیدا کرنے کی کوشش کر رہے ہیں۔
بدر معاہدہ دراصل پہلے سے موجود دفاعی شراکت داریوں کو مزید آگے بڑھانے کی کوشش بھی ہے۔ ان میں قطر کی ترکیہ کی دفاعی صنعت میں سرمایہ کاری، پاکستان اور ترکیہ کا ملجم بحری منصوبہ اور ترکیہ و انڈونیشیا کا مشترکہ ٹینک سازی کا تعاون شامل ہے۔
اس فریم ورک کے تحت قطر مالی معاونت فراہم کرے گا، جبکہ دیگر ممالک اپنی صنعتی اور تکنیکی صلاحیتوں سے مشترکہ منصوبوں میں حصہ ڈالیں گے۔ اس طرح چاروں ممالک اجتماعی دفاع کی لازمی ذمہ داری قبول کیے بغیر طویل المدتی دفاعی تعاون کو فروغ دے سکیں گے۔
ترکیہ کی بڑھتی ہوئی دفاعی صنعت کو بھی اس پیش رفت سے فائدہ پہنچنے کی توقع ہے۔ رپورٹ کے مطابق 2025 میں ترکیہ کی دفاعی اور فضائی صنعت کی برآمدات میں 48 فیصد اضافہ ہوا، جبکہ اسٹاک ہوم انٹرنیشنل پیس ریسرچ انسٹی ٹیوٹ کے مطابق گزشتہ پانچ برسوں میں اسلحے کی برآمدات 122 فیصد بڑھیں، جس کے بعد ترکیہ دنیا کا 11واں بڑا اسلحہ برآمد کرنے والا ملک بن گیا۔
بدر معاہدہ ترکیہ کو اپنی دفاعی صنعت کا دائرہ مزید وسیع کرنے کا موقع فراہم کر سکتا ہے، جبکہ پاکستان کے لیے بھی دفاعی شراکت داریوں کو مضبوط بنانے اور علاقائی سطح پر اپنی تزویراتی اہمیت بڑھانے کی نئی راہیں کھل سکتی ہیں۔
