ڈیرہ اسماعیل خان میں انسداد دہشتگردی ڈیپارٹمنٹ (سی ٹی ڈی) نے ایک بڑی دہشتگردانہ سازش کو ناکام بناتے ہوئے خاتون خودکش حملہ آور کو گرفتار کر لیا۔ حکام کے مطابق یہ کارروائی صوبہ خیبر پختونخوا میں خوارج شدت پسندوں کے خطرات کو ختم کرنے کے سلسلے میں جاری محاذ کا حصہ ہے۔
سی ٹی ڈی کی اسپیشل ویپنز اینڈ ٹیکٹکس ٹیم نے شیخ یوسف خیمہ بستی میں چھاپہ مارا۔ اس دوران ایک جوان خاتون، مسماۃ (ز)، کو رنگے ہاتھوں گرفتار کیا گیا۔ ابتدائی تفتیش میں خاتون نے اعتراف کیا کہ وہ سابقہ خارجی کمانڈر شاہ ولی عرف طارق کوچی کی تربیت حاصل کر رہی تھی اور کالعدم تنظیم ٹی ٹی پی سے وابستہ ہے۔
خاتون نے مزید بتایا کہ وہ حالیہ دنوں میں خودکش حملے کے لیے رضامند ہوئی تھی اور خودکش جیکٹ اور ہدف کی تفصیلات خارجی کمانڈر عاصم فراہم کرنے والے تھے۔ اس موقع پر سی ٹی ڈی نے خاتون کے خیمے سے ایک کمانڈو بیگ، پستول بمعہ کارتوس، پرفیوم (جو بم کی بو کو چھپانے کے لیے استعمال ہوتا تھا)، دو موبائل فون، پاور بینک اور دیگر متعلقہ سامان بھی برآمد کیا۔
انسپکٹر جنرل پولیس ذوالفقار حمید نے سی ٹی ڈی ٹیم کی کامیاب کارروائی کو سراہتے ہوئے ان کی کوششوں کے اعتراف میں نقد انعام کا اعلان کیا۔ سی ٹی ڈی حکام نے واضح کیا کہ صوبے میں دہشتگرد نیٹ ورکس کے خلاف کارروائیاں بغیر کسی تفریق کے جاری رہیں گی اور ریاستی اداروں کے خلاف عناصر کے لیے صفر برداشت کی پالیسی برقرار رہے گی۔
دیکھیے: بلخ کا رہائشی اور طالبان فورسز کا رکن باجوڑ حملے میں ملوث، اہم ثبوت سامنے آ گئے