طالبان مخالف حملوں کی لہر بغلان اور بدخشاں کے بعد قندوز بھی پہنچ گئی جہاں، گورنر ہاؤس کے قریب چہار درہ روڈ پر طالبان کی سکیورٹی کی گاڑی کو نامعلوم افراد نے دستی بم کا نشانہ بنایا، جس سے گاڑی تباہ ہوگئی اور دو طالبان اہلکار ہلاک اور دو زخمی ہوگئے، جنہیں ہسپتال پہنچا دیا گیا ہے۔
سورس کے مطابق طالبان فورسز پر یہ حملہ اتوار کے روز شام کے وقت پیش آیا۔ طالبان کی سکیورٹی سے منسلک گاڑی اپنی معمول کی رفتار سے گشت کر رہی تھی کہ قریب سے گزرنے والے دو موٹر سائیکل سواروں نے گاڑی پر بم سے حملہ کردیا، جس کے نتیجے میں دو طالبان اہلکار موقع پر ہلاک اور دو زخمی ہوگئے، جنہیں فوری طور پر طبی امداد کے لیے ہسپتال منتقل کردیا گیا ہے۔
بعد ازاں طالبان مخالف تنظیم اے ایف ایف نے اس کارروائی کی ذمہ داری قبول کرلی ہے۔ اے ایف ایف کی کارروائیوں میں اضافہ ہوا ہے اور گزشتہ ایک ہفتے میں یہ ان کی تیسری واردات ہے۔ پہلی واردات بغلان میں کی گئی اس کے دو دن بعد بدخشاں اور اب قندوز میں یہ کارروائی کردی گئی ہے، جس کا مطلب یہ ہے کہ افغان طالبان مخالف قوتیں، تسلسل کے ساتھ متحرک ہو رہی ہیں۔