اسلام آباد: پاک بحریہ نے شمالی بحیرہ عرب میں کامیاب سرچ اینڈ ریسکیو آپریشن کرتے ہوئے ایک تجارتی جہاز کے 18 رکنی غیر ملکی عملے کو بحفاظت ریسکیو کرلیا، ہنگامی سگنل موصول ہونے پر فوری کارروائی عمل میں لائی گئی۔
پاک فوج کے شعبہ تعلقات عامہ (آئی ایس پی آر) کے مطابق تجارتی بحری جہاز ایم وی گولڈ آٹم سے ہنگامی پیغام موصول ہونے کے بعد پاک بحریہ کا جہاز پی این ایس حنین فوری طور پر جائے وقوعہ پر پہنچا اور امدادی کارروائیاں شروع کیں۔
اعلامیے کے مطابق ریسکیو کیے گئے افراد میں چین، بنگلادیش، میانمار، ویتنام اور انڈونیشیا کے شہری شامل ہیں، جنہیں محفوظ طریقے سے جہاز سے نکالا گیا۔
آئی ایس پی آر کا کہنا ہے کہ پاک بحریہ کے جہاز پی این ایس حنین نے پیشہ ورانہ مہارت کا مظاہرہ کرتے ہوئے نہ صرف عملے کو بحفاظت منتقل کیا بلکہ جہاز پر موجود ماہر ٹیم نے فوری طبی امداد فراہم کی اور آگ بجھانے میں بھی مدد دی۔
حکام کے مطابق نقصان کا تفصیلی جائزہ لینے کے بعد تمام افراد کو مزید طبی سہولتوں اور اپنے اپنے ممالک واپسی کے انتظامات کیلئے کراچی منتقل کر دیا گیا ہے۔
آئی ایس پی آر نے کہا کہ پاک بحریہ سمندر میں کسی بھی ہنگامی صورتحال سے نمٹنے کیلئے ہمہ وقت تیار ہے اور بین الاقوامی سمندری ذمہ داریوں کی ادائیگی جاری رکھے ہوئے ہے۔
دیکھئیے:کابل یونیورسٹی: افغان وزیرِ تعلیم کا طالب علم پر تشدد، ازبک ٹوپی پہننا جرم بن گیا
