افغانستان میں طالبان انٹیلی جنس (جی ڈی آئی) سے وابستہ مبینہ سوشل میڈیا اکاؤنٹس کی جانب سے ایک جعلی پراپیگنڈا مہم کا انکشاف ہوا ہے، جس میں کراچی کے ایک معروف تاجر کو داعش خراسان کا کمانڈر قرار دیا گیا۔ سوشل میڈیا پر سرگرم مبصرین کے مطابق گزشتہ تین ہفتوں کے دوران یہ اکاؤنٹس خیبر پختونخوا کے ضلع خیبر میں واقع علاقے تیراہ میں داعش خراسان کی موجودگی کے جھوٹے دعوے کرتے رہے۔
ان اکاؤنٹس نے “حافظ زبیر موحد” کے نام سے ایک فرضی نام کا دعوی کیا اور اسے تیراہ میں داعش خراسان کا کمانڈر بتایا۔ انہوں نے یہاں تک دعویٰ کیا کہ یہ شخص اسلام آباد میں ہونے والے حالیہ خودکش حملے کے وقت وفاقی دارالحکومت میں موجود تھا۔
تاہم تحقیقات سے یہ بات سامنے آئی کہ ان اکاؤنٹس کی پھیلائی گئی تصویر دراصل کراچی کے ایک معروف تاجر اور پراپرٹی ڈیلر حافظ محمد کی تھی، جو سوشل میڈیا پر فعال ہیں اور جن کا نہ تو داعش سے کوئی تعلق ہے اور نہ ہی وہ کبھی تیراہ کے علاقے میں گئے ہیں۔ مبصرین کے مطابق یہ ایک منظم پراپیگنڈا تھا جس میں ایک عام شہری کی شناخت کو مسخ کر کے اسے دہشتگرد قرار دیا گیا۔
اس انکشاف کے بعد سوال اٹھائے جا رہے ہیں کہ آیا طالبان حکومت سے منسلک حلقے مقبوضہ علاقوں میں داعش کی موجودگی کے دعوؤں کو مضبوط بنانے کے لیے ایسے جعلی بیانیے تشکیل دے رہے ہیں۔ کراچی کے تاجر حافظ محمد کے سماجی میڈیا اکاؤنٹس پر ان کی عام سرگرمیاں اس بات کی واضح تردید کرتی ہیں کہ ان کا دہشتگردی سے کوئی تعلق ہو۔
دیکھیے: طالبان وزارتِ دفاع کے دعوے مسترد، افغان سرزمین پر دہشت گرد گروہوں کی موجودگی ثابت