مظفرآباد: وزیراعظم آزاد کشمیر فیصل ممتاز راٹھور نے عیدالفطر کے موقع پر کشمیریوں کی قربانیوں کو خراج تحسین پیش کرتے ہوئے کہا ہے کہ حقِ خودارادیت کا حصول اقوام متحدہ کی قراردادوں کے مطابق یقینی بنایا جانا چاہیے۔
کشمیر میڈیا سروس کے مطابق اپنے پیغام میں انہوں نے کنٹرول لائن کے دونوں جانب بسنے والے کشمیریوں کو عید کی مبارکباد دی اور کہا کہ اس موقع پر ان لوگوں کو فراموش نہیں کیا جا سکتا جو 1947 سے اور خصوصاً 1989 کے بعد سے بھارتی مظالم کا سامنا کر رہے ہیں۔
فیصل ممتاز راٹھور نے کہا کہ مقبوضہ جموں و کشمیر کے عوام آزادی کے لیے مسلسل قربانیاں دے رہے ہیں اور پوری پاکستانی و کشمیری قوم ان کے جذبے کو سلام پیش کرتی ہے۔ انہوں نے دعا کی کہ کشمیری جلد آزادی حاصل کریں اور اگلی عید آزاد فضا میں منائیں۔
وزیراعظم آزاد کشمیر نے عالم اسلام، پاکستانی اور کشمیری عوام کو عید کی مبارکباد دیتے ہوئے کہا کہ اس موقع پر ہمیں منفی سرگرمیوں سے دور رہ کر ملک و قوم کی ترقی کے لیے کردار ادا کرنا چاہیے۔
دیکھئیے:مقبوضہ جموں وکشمیر: شادی کی تقریب میں فاروق عبداللہ پر قاتلانہ حملہ ناکام