واشنگٹن: عالمی شہرت یافتہ فنکار اینڈی روس نے مشرقِ وسطیٰ میں امن کے قیام اور عالمی سفارت کاری میں پاکستان کے کلیدی کردار کو سراہتے ہوئے وزیراعظم شہباز شریف اور فیلڈ مارشل عاصم منیر کو زبردست خراجِ تحسین پیش کیا ہے۔ اپنے نئے ریپ کلام “فائر ٹو پیس میں اینڈی روس نے ان عالمی حالات کی منظر کشی کی ہے جب دنیا ایک بڑی جنگ کے دہانے پر کھڑی تھی اور پاکستان نے ایک مدبر ثالث کے طور پر سامنے آ کر عالمی امن کو بچایا۔
اینڈی روس کے کلام کے بول اس وقت کی سنگینی کو بیان کرتے ہیں جب اسرائیل، ایران اور امریکہ کے درمیان کشیدگی کے باعث مشرقِ وسطیٰ ایک جنگی زون میں تبدیل ہو چکا تھا، شہر تباہ ہو رہے تھے اور عالمی منڈیاں جمود کا شکار تھیں۔ ایسے میں جب دنیا اندھیروں کی طرف بڑھ رہی تھی، پاکستان کی قیادت نے اپنی بہترین تزویراتی حکمتِ عملی سے عالمی شور کو خاموشی اور امن میں بدل دیا۔ فنکار نے اپنے کلام میں اس بات پر زور دیا کہ جب ہر طرف سے مذاکرات کے دروازے بند ہو رہے تھے، تب اسلام آباد نے امن کی شمع روشن کی۔
اپنے پیغام میں اینڈی روس نے وزیراعظم شہباز شریف اور فیلڈ مارشل عاصم منیر کی میزبانی اور ان کی امن کوششوں کی تعریف کرتے ہوئے کہا کہ “پاکستان اس پورے عمل میں ایک ناقابلِ یقین ثالث رہا ہے”۔ انہوں نے فیلڈ مارشل اور وزیراعظم کے کردار کو سراہتے ہوئے کہا کہ اگر امن معاہدہ اسلام آباد میں دستخط ہوتا ہے تو وہ خود وہاں جانے کی خواہش رکھتے ہیں۔ سوشل میڈیا پر اس کلام کو پاکستان کے بڑھتے ہوئے سفارتی اثر و رسوخ اور عالمی قیادت کے اعتراف کے طور پر دیکھا جا رہا ہے، جہاں صارفین اسے قومی فخر کی علامت قرار دے رہے ہیں۔
دیکھئیے:پاکستان کا نیا اثر و رسوخ اسے ایک نازک جغرافیائی سیاسی جال کے مرکز میں لے آیا ہے