خیبرپختونخوا پولیس نے کوہاٹ میں اینٹی ڈرون جیمنگ سسٹم استعمال کرتے ہوئے ایک مشکوک ڈرون کو ناکارہ بنا دیا۔
پولیس حکام کے مطابق 13 مارچ 2026 کو کوہاٹ پولیس نے سیکیورٹی کے پیش نظر کوہاٹ کینٹ کے قریب ریڈ زون میں اینٹی ڈرون جیمنگ گن تعینات کی تھی۔
اسی دوران فضا میں ایک ڈرون دیکھا گیا جسے فوری طور پر جیمنگ سسٹم کے ذریعے نشانہ بنایا گیا۔
حکام کا کہنا ہے کہ جیمنگ گن نے ڈرون کے موٹر سسٹم کو متاثر کیا جس کے باعث وہ پرواز جاری نہ رکھ سکا اور ناکارہ ہو گیا۔
پولیس کے مطابق اس کارروائی کے نتیجے میں ڈرون اپنے ممکنہ ہدف تک پہنچنے یا دھماکہ کرنے میں ناکام رہا۔
پولیس حکام کا کہنا ہے کہ اگر اینٹی ڈرون جیمنگ گنز کو درست طریقے سے تعینات کیا جائے تو یہ نظام انتہائی مؤثر ثابت ہو سکتا ہے، اس لیے ایسے واقعات میں بروقت ردعمل اور صورتحال سے مکمل آگاہی انتہائی ضروری ہے۔
حکام کے مطابق خیبرپختونخوا پولیس کو جدید سیکیورٹی خطرات سے نمٹنے کیلئے بکتر بند گاڑیاں، طویل فاصلے تک نشانہ بنانے والے ہتھیار، نائٹ وژن اور تھرمل امیجنگ آلات، اینٹی ڈرون سسٹمز اور دیگر جدید آلات فراہم کیے جا رہے ہیں۔
دیکھئیے:کوہاٹ کینٹ میں دہشت گردوں کی ڈرون حملوں کی مذموم کوشش؛ سکیورٹی فورسز نے ناکام بنا دی