سوشل میڈیا پر سنسنی خیزی اور ویوز کی دوڑ میں اخلاقی حدود پار کرنے والے اسد طور ایک بار پھر خبر کے نام پر قیاس آرائی، جھوٹ اور سیاسی چورن بیچتے ہوئے رنگے ہاتھوں پکڑے گئے ہیں۔ حقیقت یہ ہے کہ ان کی جانب سے چلائی جانے والی حالیہ کہانی صرف اور صرف سوشل میڈیا ٹریکشن، یوٹیوب تھمب نیلز اور سیاسی سنسنی پیدا کرنے کے لیے گھڑی گئی تھی، جس کا زمینی حقائق اور سنجیدہ صحافت سے دور دور تک کوئی تعلق نہیں ہے۔
موصوف نے بغیر کسی دستاویزی یا عینی ثبوت کے یہ مبالغہ آمیز دعویٰ کیا کہ پی ٹی آئی اور حکومت کے نمائندوں کے درمیان ملاقاتیں ہو رہی ہیں جن کا ایجنڈا عمران خان تک رسائی، اسٹیبلشمنٹ سے ڈیل، عید کے دن ملاقات، اور محمود خان اچکزئی کی بجٹ سے متعلق دھمکی جیسے سیاسی رابطے ہیں، جو کہ سراسر جھوٹ اور پراپیگنڈے کے سوا کچھ بھی ثابت نہیں ہو سکا۔
جھوٹ پر جھوٹ
اسد طور نے اپنی اس فیک نیوز کی مشینری کو چلانے کے لیے جھوٹ پر جھوٹ جوڑا۔ انہوں نے پہلے تو ملاقات کا ایک فرضی ایجنڈا بدلا، پھر سنسنی بڑھانے کے لیے بانی پی ٹی آئی کی ہمشیرہ علیمہ خان کی موجودگی کا دعویٰ گھڑ لیا۔ اس کے بعد وفاقی وزیر محسن نقوی کو اپنی مرضی کے سیاسی فریم میں فٹ کیا اور آخر میں عید کے دن عمران خان سے ملاقات کی ایک ایسی من گھڑت کہانی بنائی جس کا کوئی وجود ہی نہیں تھا۔
سیاسی مبصرین کا کہنا ہے کہ یہ صحافت نہیں بلکہ جھوٹ، پراپیگنڈا اور بے پر کی اڑانا ہے، جہاں خبر نہ ملے تو یوٹیوب کی دکان چمکانے کے لیے سیاسی افواہ سازی کا سہارا لیا جاتا ہے۔ جب کوئی ثبوت نہیں ہوتا تو اسد طور جیسے لوگ “ذرائع” کے نام کا سہارا لے کر من پسند کردار شامل کرتے ہیں، انہیں سازشی رنگ دیتے ہیں اور پھر اسے بریکنگ نیوز بنا کر پیش کرتے ہیں۔
علیمہ خان کی تردید اور اسد طور
اس جھوٹ کا بھانڈا اس وقت بیچ چوراہے پھوٹ گیا جب خود علیمہ خان نے سامنے آ کر ایسی کسی بھی ملاقات یا خاندان کی شمولیت سے دوٹوک الفاظ میں لاعلمی ظاہر کر دی اور اس فرضی کہانی کو مسترد کر دیا۔ جیسے ہی یہ جھوٹ پکڑا گیا، اسد طور نے اپنی سبکی مٹانے کے لیے فوراً پینترا بدلا اور ایک وضاحتی ٹویٹ کے ذریعے اسے “فیملی میٹنگ” کے بجائے پی ٹی آئی قیادت کی محسن نقوی سے ملاقات بنا کر نیا فریم دینے کی کوشش کی۔
یعنی پہلے دعویٰ کیا کہ علیمہ خان، سہیل آفریدی اور بیرسٹر گوہر نے ملاقات کی، اور جب دال نہ گلی تو خاموشی سے یہ تاثر دینے لگے کہ اسٹیبلشمنٹ پی ٹی آئی سے مذاکرات کے لیے بے تاب ہے۔ اس طرزِ عمل سے واضح ہوتا ہے کہ جب خبر غلط نکلے تو اسے اخلاقی طور پر واپس لینے کے بجائے نیا پروپیگنڈا بنا دیا جائے تاکہ سنسنی برقرار رہے، کیونکہ جھوٹ کے پاؤں نہیں ہوتے۔
اندرونی انتشار
حقیقت یہ ہے کہ پی ٹی آئی کے اندرونی انتشار، بجٹ کے موقع پر کی جانے والی کمزور سیاست اور مسلسل ناکام سیاسی دباؤ کو چھپانے کے لیے اب ایسی جھوٹی “بیک چینل” کہانیاں مارکیٹ میں پھینکی جا رہی ہیں۔ ریاستی معاملات کبھی بھی قیاس آرائیوں، یوٹیوب تھمب نیلز اور فیک نیوز کے دباؤ پر نہیں چلتے۔ جو لوگ ہر ملاقات کو سازش، ہر سیاسی رابطے کو ڈیل، اور ہر قانونی عمل کو اسٹیبلشمنٹ کا کھیل بنا کر پیش کرتے ہیں، وہ دراصل عوام کو گمراہ کر رہے ہیں۔
اسد طور نے اس بار کوئی خبر نہیں دی بلکہ فیک نیوز کا ایک پورا پیکج بیچا ہے، جس کا مقصد معلومات کی فراہمی نہیں بلکہ صرف اور صرف ڈیجیٹل ٹریکشن اور ریٹنگز کا حصول تھا۔ غیور عوام اب جان چکے ہیں کہ یہ اس پرانی فیک نیوز فیکٹری کا ایک نیا پروڈکٹ ہے۔
