پاکستان کے وزیر داخلی، چیئرمین پی سی بی اور ایشین کرکٹ کونسل کے سربراہ محسن نقوی نے ایشیا کپ 2025 کی تاریخوں اور وینیو کا باقاعدہ اعلان کر دیا۔ یہ اعلان بھارتی حکومت کی جانب سے بھارتی کرکٹ ٹیم کو ایشیا کپ میں شرکت کی اجازت ملنے کے بعد کیا گیا۔
محسن نقوی نے اپنے پیغام میں کہا کہ مجھے خوشی ہے کہ میں ایشیا کپ 2025 کے شیڈول کی تصدیق کر رہا ہوں جو متحدہ عرب امارات میں منعقد ہوگا۔
انہوں نے کہا کہ یہ باوقار ٹورنامنٹ 9 ستمبر سے 28 ستمبر تک کھیلا جائے گا جس میں ہم شاندار کرکٹ مقابلوں کے منتظر ہیں، ٹورنامنٹ کا تفصیلی شیڈول جلد جاری کیا جائے گا۔
یاد رہے کہ ایشیا کپ 2025 متحدہ عرب امارات میں منعقد ہوگا جس میں پاکستان، بھارت، سری لنکا، بنگلادیش، افغانستان، یو اے ای، ہانگ کانگ اور عمان کی ٹیمیں شریک ہونگی۔
اس سے قبل یہ کہا جا رہا تھا کہ حالیہ پاک بھارت کشیدگی کے بعد بھارت اس ٹورنامنٹ میں شامل نہیں ہوگا۔ بی سی سی آئی کے سیکریٹری دیو جیت سائکیا نے اس حوالے سے گفتگو کرتے ہوئے کہا ہے کہ ’ہمیں کچھ رپورٹس کے بارے میں معلوم ہوا ہے جن میں دعویٰ کیا گیا ہے کہ بی سی سی آئی نے ایشین کرکٹ کونسل (اے سی سی) کے ایونٹس مینز ایشیا کپ اور ویمنز ایمرجنگ ایشیا کپ میں شرکت نہ کرنے کا فیصلہ کیا ہے، جو بالکل بے بنیاد ہیں۔‘
انہوں نے کہا کہ ’بی سی سی آئی نے آئندہ اے سی سی ایونٹس کے حوالے سے نہ تو کوئی بات چیت کی ہے اور نہ ہی کوئی قدم اٹھایا ہے۔‘
ایشین کرکٹ کونسل نے جلد ہی ٹورنامنٹ کا باقاعدہ شیڈول جاری کرنے کا اعلان کیا ہے۔