لاہور میں مولانا امیر حمزہ پر قاتلانہ حملہ، فائرنگ سے زخمی، پولیس تحقیقات جاری

لاہور کے علاقے پیکو روڈ، پنڈی اسٹاپ کے قریب تحریک حرمتِ رسول پاکستان کے چیئرمین اور معروف اہلحدیث عالم مولانا امیر حمزہ پر قاتلانہ حملہ ہوا ہے۔ ذرائع کے مطابق مولانا نجی ٹی وی ’24 نیوز’ کے پروگرام ‘نورِ سحر’ میں شرکت کے بعد اپنے گھر واپس جا رہے تھے کہ موٹر سائیکل پر سوار دو نامعلوم مسلح افراد نے ان کا پیچھا کیا اور ان کی گاڑی پر اندھا دھند فائرنگ کر دی۔

فائرنگ کے نتیجے میں مولانا امیر حمزہ زخمی ہو گئے ہیں۔ ابتدائی طبی معلومات کے مطابق ایک گولی ان کے بازو میں لگی ہے، تاہم خوش قسمتی سے ان کی حالت خطرے سے باہر بتائی جاتی ہے۔ واقعے کے فوری بعد انہیں طبی امداد فراہم کی گئی جہاں ڈاکٹروں نے ان کی حالت کو مستحکم قرار دیا ہے۔

کاروائی اور تحقیقات

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیے ہیں۔ پولیس حکام کا کہنا ہے کہ جائے وقوعہ کے گرد و نواح میں نصب سی سی ٹی وی کیمروں کی فوٹیج حاصل کی جا رہی ہے تاکہ ملزمان کی شناخت اور سمت کا تعین کیا جا سکے۔ پولیس نے مختلف مقامات پر ناکہ بندی کر کے حملہ آوروں کی تلاش کے لیے سرچ آپریشن بھی شروع کر دیا ہے۔

ردِ عمل

مولانا امیر حمزہ پر حملے کی خبر سنتے ہی مذہبی اور سیاسی حلقوں میں تشویش کی لہر دوڑ گئی ہے۔ تحریک حرمتِ رسول کے کارکنان اور دیگر مذہبی رہنماؤں نے اس بزدلانہ حملے کی شدید مذمت کرتے ہوئے حکومت اور انتظامیہ سے مطالبہ کیا ہے کہ ملزمان کو فوری گرفتار کر کے کیفرِ کردار تک پہنچایا جائے اور مذہبی رہنماؤں کی سکیورٹی کو مزید موثر بنایا جائے۔