آزاد جموں و کشمیر میں جاری انتخابی عمل کا تیسرا مرحلہ پُرامن اور کامیابی کے ساتھ مکمل ہو گیا ہے، جس میں شہریوں نے ووٹ کے حق کا استعمال کرتے ہوئے جمہوریت اور ریاستی اداروں پر اپنے کامل اعتماد کی مہر ثبت کر دی ہے۔
انتخابات کے اس مرحلے میں عوام کی بڑی تعداد نے پولنگ اسٹیشنوں کا رخ کر کے یہ ثابت کر دیا کہ وہ کسی بھی قسم کے انتشار اور عدم استحکام کے بجائے پُرامن اور جمہوری راستہ منتخب کرنا چاہتے ہیں۔ عوامی شرکت کے اس روشن عمل نے خطے میں بدامنی کا ماحول پیدا کرنے کی تمام کوششوں کو ناکام بنا دیا ہے۔
تجزیہ کاروں کے مطابق انتخابی نتائج اور عوامی شرکت کے اس واضح مینڈیٹ نے کالعدم ایکشن کمیٹی کے پاکستان مخالف بیانیے کو ایک بار پھر مکمل طور پر مسترد کر دیا ہے۔ الیکشن سے پہلے بھی کالعدم ایکشن کمیٹی کا کردار، پالیسیاں اور بیانات مسلسل پاکستان اور ریاستی مفادات کے خلاف رہے ہیں، جن کا مقصد آزاد کشمیر کے شہریوں کو گمراہ کرنا اور خطے کے امن کو داؤ پر لگانا تھا۔
تاہم، آزاد کشمیر کے غیور عوام نے اپنے ووٹ کی طاقت سے ایک بار پھر ثابت کر دیا ہے کہ وہ ایسی تمام سازشوں کو ناکام بنانا جانتے ہیں۔ انتخابی عمل کے اس تیسرے مرحلے کی کامیابی نے نہ صرف خطے میں جمہوری تسلسل اور استحکام کو مضبوط کیا ہے بلکہ انتشار پسندی کو حتمی شکست بھی دی ہے۔