دنیا بھر میں مقبول ٹک ٹاک اسٹار خابی لیم کے انتقال سے متعلق خبریں بے بنیاد قرار دے دی گئیں۔ حالیہ دنوں سوشل میڈیا پر متعدد پوسٹس وائرل ہوئیں جن میں دعویٰ کیا گیا تھا کہ خابی لیم ایک کار حادثے میں ہلاک ہوگئے ہیں۔
یہ افواہیں یوٹیوب، فیس بک اور ایکس سمیت مختلف پلیٹ فارمز پر تیزی سے پھیلیں، جبکہ بعض جعلی پوسٹس میں ایک تباہ شدہ گاڑی کی تصاویر بھی شیئر کی گئیں جنہیں غلط طور پر خابی لیم سے منسوب کیا گیا۔
تاہم بعد ازاں متعدد معتبر فیکٹ چیکنگ اداروں، بشمول رائٹرز اور اسنوپس، نے تصدیق کی کہ خابی لیم کے کسی حادثے کی کوئی مستند اطلاع موجود نہیں۔ یہ تمام دعوے جھوٹے اور کلک بیٹ ویب سائٹس و فشنگ لنکس پھیلانے والے اکاؤنٹس سے منسلک پائے گئے۔
خابی لیم کے قریبی ذرائع نے بھی وضاحت کی ہے کہ وہ زندہ اور مکمل طور پر خیریت سے ہیں۔
یاد رہے کہ خابی لیم، جو سینیگال میں پیدا ہوئے اور اٹلی میں پروان چڑھے، نے 2020 میں کورونا وبا کے دوران اپنی نوکری کھونے کے بعد ٹک ٹاک پر مختصر مزاحیہ ویڈیوز سے شہرت حاصل کی۔
وہ بغیر بولے طنزیہ انداز میں روزمرہ زندگی کے مسائل پر ویڈیوز بنانے کے لیے مشہور ہیں اور ان کے 160 ملین سے زائد فالوورز ہیں۔
دیکھیں: خیبر پختونخوا میں سیکیورٹی فورسز کی کارروائیاں، مزید 34 خوارج ہلاک