سعودی قیادت میں قائم اتحاد نے دعویٰ کیا ہے کہ مدینہ منورہ کے علاقے میں ایک ڈرون کو فضائی دفاعی نظام کے ذریعے روک کر تباہ کردیا گیا ہے۔
خبر رساں ادارے اے ایف پی کے مطابق اتحاد کے ترجمان ترکی المالکی نے ڈرون کو روکنے اور تباہ کرنے کی تصدیق کی، تاہم اس حوالے سے مزید تفصیلات فراہم نہیں کیں۔
سعودی اتحاد ماضی میں بھی مکہ مکرمہ اور مدینہ منورہ جیسے مقدس شہروں کو ڈرونز اور میزائلوں کے ذریعے نشانہ بنانے کی کوششوں کے دعوے کرتا رہا ہے۔
دوسری جانب یمن کے حوثی گروپ نے سعودی عرب کے مقدس شہروں پر حملوں میں ملوث ہونے کے الزامات کی سختی سے تردید کی ہے۔
تازہ واقعے کے بارے میں تاحال یہ واضح نہیں ہوسکا کہ ڈرون کہاں سے آیا، اسے کس نے بھیجا تھا اور اس کا ممکنہ ہدف کیا تھا۔ سعودی اتحاد کی جانب سے بھی ان تفصیلات پر مزید وضاحت سامنے نہیں آئی۔





