لاہور کی مقامی عدالت نے معروف یوٹیوبر سعد الرحمن، جو ‘ڈکی بھائی’ کے نام سے مشہور ہیں، اور ان کی اہلیہ عروب جتوئی سمیت دیگر ملزمان پر آن لائن جوئے کی تشہیر کے مقدمے میں فرد جرم عائد کر دی ہے۔ ضلع کچہری لاہور میں جوڈیشل مجسٹریٹ نعیم وٹو نے کیس کی سماعت کی، جس کے دوران تمام ملزمان عدالت کے روبرو پیش ہوئے۔ عدالت نے ملزمان کو فرد جرم پڑھ کر سنائی، تاہم ملزمان نے صحتِ جرم سے انکار کرتے ہوئے خود کو بے قصور قرار دیا ہے۔
عدالت نے مقدمے کی کارروائی کو آگے بڑھاتے ہوئے استغاثہ کے گواہوں کو 23 فروری کے لیے طلب کر لیا ہے تاکہ ان کی شہادتیں قلمبند کی جا سکیں۔ واضح رہے کہ وفاقی تحقیقاتی ادارے (ایف آئی اے) کے سائبر کرائم ونگ (این سی سی آئی اے) نے سعد الرحمن عرف ڈکی اور ان کی اہلیہ کے خلاف آن لائن جوا ویب سائٹس کی غیر قانونی تشہیر اور نوجوان نسل کو اس جانب راغب کرنے کے الزامات کے تحت مقدمہ درج کر رکھا ہے۔ ملزمان کی جانب سے صحتِ جرم سے انکار کے بعد اب کیس کی باقاعدہ سماعت آئندہ تاریخ سے شروع ہوگی۔
دیکھیے: پاکستان کی دہشت گردی کے خلاف نئی حکمت عملی، 7,500 سے زائد شدت پسندوں کی شہریت منسوخ