فیصل قریشی کا ستارہ امتیاز نہ ملنے پر طنزیہ ردعمل، کیلشیم کی کمی ہے شاید

کراچی: پاکستان کے سینئر اداکار فیصل قریشی نے ستارہ امتیاز نہ ملنے پر طنزیہ انداز میں ناراضگی کا اظہار کیا ہے، جس کا ویڈیو کلپ سوشل میڈیا پر وائرل ہو گیا۔

ایک حالیہ انٹرویو کے دوران میزبان نے ان سے سوال کیا کہ کیا انہیں جلد ستارہ امتیاز ملنے والا ہے، جس پر اداکار نے مزاحیہ انداز میں جواب دیتے ہوئے کہا کہ “میں سوچ رہا ہوں امتیاز (سپر اسٹور) میں جا کر کھڑا ہو جاؤں اور کہوں مجھے ستارہ نہیں مل رہا۔”

فیصل قریشی نے بتایا کہ ان کا نام دو بار ایوارڈ کیلئے بھیجا گیا لیکن انہیں اعزاز نہیں مل سکا، حالانکہ وہ گزشتہ 33 برس سے شوبز انڈسٹری میں خدمات انجام دے رہے ہیں۔

جب ان سے پوچھا گیا کہ آخر ایسی کیا کمی رہ گئی، تو انہوں نے ایک بار پھر طنز کرتے ہوئے کہا کہ “شاید مجھ میں کیلشیم کی کمی ہے، اسی لیے ایوارڈ نہیں دے رہے”، جس پر میزبان بھی ہنس پڑے۔

اداکار کا کہنا تھا کہ انہیں مداحوں کی جانب سے بتایا گیا ہے کہ ان کے لیے تمغہ امتیاز کی سفارشات بھیجی جا رہی ہیں، تاہم وہ خود کو سیاسی شخصیت نہیں بلکہ محب وطن پاکستانی سمجھتے ہیں۔

انہوں نے مزید کہا کہ جب بھی انہیں یہ اعزاز دیا جائے گا وہ اسے ضرور قبول کریں گے۔

دیکھئیے:جیجی حدید کا ایپسٹین فائلز میں نام آنے پر ردعمل سامنے آ گیا، ایپسٹین سے کبھی ملاقات تک نہیں ہوئی