کوئی پاگل ہی ہو گا جو اس کامیابی پر خوش نہ ہو، حکومت کیساتھ ہیں، پاکستان اور پاک فوج کے ساتھ اظہار یکجہتی، محمود اچکزئی

اسلام آباد: ایران۔امریکا جنگ بندی میں پاکستان کے کردار پر اپوزیشن قیادت نے بھی حکومت اور مسلح افواج کے ساتھ یکجہتی کا اظہار کرتے ہوئے اسے قومی کامیابی قرار دیا ہے۔

قومی اسمبلی میں قائد حزب اختلاف محمود خان اچکزئی نے خطاب کرتے ہوئے کہا کہ “کوئی پاگل ہی ہوگا جو اس کامیابی پر خوش نہ ہو”، موجودہ حالات میں تمام اختلافات بالائے طاق رکھ کر حکومت کا ساتھ دینا چاہیے۔

انہوں نے کہا کہ “ہمارے اختلافات اپنی جگہ، مگر اس وقت ہم پاکستان کے ساتھ ہیں”، اور حکومت کی غیر مشروط حمایت کا اعلان کرتے ہوئے “پاکستان زندہ باد، پاک فوج زندہ باد” کے نعرے بھی لگائے۔

محمود اچکزئی کا کہنا تھا کہ تمام سیاسی قیادت کو ایک پلیٹ فارم پر بیٹھ کر فیصلے کرنے چاہئیں تاکہ ملک کو درپیش چیلنجز سے نمٹا جا سکے۔ انہوں نے بانی پی ٹی آئی سے بات چیت کی ضرورت پر بھی زور دیا اور کہا کہ قومی مفاد میں سیاسی ہم آہنگی ضروری ہے۔

دوسری جانب سینیٹ میں خطاب کرتے ہوئے عوامی نیشنل پارٹی کے صدر ایمل ولی خان نے بھی حکومت کے کردار کو سراہا اور اسے پاکستان کیلئے “تاریخی دن” قرار دیا۔

ایمل ولی خان نے وزیراعظم شہباز شریف اور فیلڈ مارشل عاصم منیر کو مبارکباد دیتے ہوئے کہا کہ پاکستان نے دنیا کو یہ پیغام دیا ہے کہ تنازعات کا حل جنگ نہیں بلکہ مذاکرات ہیں۔

انہوں نے کہا کہ پاکستان امن، پیار اور بھائی چارے کا داعی ہے اور مستقل استحکام کیلئے اسی راستے پر آگے بڑھنا ہوگا۔

سیاسی مبصرین کے مطابق اپوزیشن کی جانب سے اس نوعیت کی حمایت اس بات کی عکاسی کرتی ہے کہ اہم قومی معاملات پر سیاسی تقسیم کم ہو رہی ہے اور پاکستان عالمی سطح پر ایک متحد مؤقف کے ساتھ سامنے آ رہا ہے۔

دیکھئیے:قومی اتحاد ہی بنیاد: اداروں کی ہم آہنگی اور عوامی حمایت سے پاکستان کے عالمی کردار میں اضافہ