تربت: سکیورٹی فورسز نے بلوچستان کے جنوبی علاقے میں امن و امان کی صورتحال برقرار رکھنے کے لیے ایک بڑی کامیابی حاصل کی ہے۔ فرنٹیئر کور (ایف سی) بلوچستان ساؤتھ نے بلیدہ کے علاقے نیوانو میں ایک مؤثر اور کامیاب کاروائی کے دوران کالعدم فتنہ ہندوستان کے دو اہم اور مطلوب دہشت گردوں کو ہلاک کر دیا ہے۔
سکیورٹی ذرائع کے مطابق یہ آپریشن انٹیلیجنس معلومات کی بنیاد پر انتہائی مہارت کے ساتھ کیا گیا۔ ہلاک ہونے والے دونوں دہشت گرد سکیورٹی فورسز کے خلاف کاروائیوں کے علاوہ سنگین جرائم میں ملوث تھے۔
یہ عسکریت پسند علاقے میں بھتہ خوری، معصوم بلوچ شہریوں کی ٹارگٹ کلنگ اور عوامی و نجی گاڑیوں کو نذرِ آتش کرنے کی متعدد وارداتوں میں مطلوب تھے۔
ایف سی حکام کا کہنا ہے کہ دہشت گردوں کے اس نیٹ ورک کے خلاف کارروائی جنوبی بلوچستان میں امن، استحکام اور شہریوں کے تحفظ کو یقینی بنانے کی جانب ایک بڑا اور اہم قدم ہے۔
ترجمان کے مطابق معصوم شہریوں کو نشانہ بنانے والے عناصر کے خلاف سکیورٹی فورسز کی کاروائیاں جاری رہیں گی تاکہ خطے میں ترقی اور پائیدار امن کے عمل کو سبوتاژ نہ کیا جا سکے۔