فیلڈ مارشل سید عاصم منیر نے قیامِ امن کو “مقدس فریضہ” قرار دیتے ہوئے کہا ہے کہ ملک کی مسلح افواج ہمیشہ بہادر اور قابلِ فخر پولیس فورس کے ساتھ کھڑی رہیں گی۔ انہوں نے کہا کہ عوامی پولیس فورس ملکی سلامتی و استحکام میں نمایاں کردار ادا کرتی ہے۔
تفصیلات کے مطابق فیلڈ مارشل نے اسلام آباد میں واقع نیشنل پولیس اکیڈمی کا دورہ کیا، جہاں وزیر داخلہ محسن نقوی سمیت ان کا استقبال کیا گیا۔ کمانڈنٹ نیشنل پولیس اکیڈمی کی قیادت میں پولیس کے چاق و چوبند دستے نے فیلڈ مارشل کو گارڈ آف آنر پیش کیا، جس کے بعد انہوں نے اکیڈمی کی سہولیات کا معائنہ کیا۔
اس موقع پر فیلڈ مارشل نے اکیڈمی میں زیر تربیت افراد سے ملاقات کی اور شہداء کی یادگار پر حاضری دے کر خراج عقیدت پیش کیا۔ انہوں نے یادگار پر پھول چڑھاتے ہوئے ان پولیس اہلکاروں کی قربانیوں کو سلام پیش کیا جنہوں نے فرض کی انجام دہی میں اپنی جانوں کا نذرانہ پیش کیا۔
دورے کے دوران فیلڈ مارشل کو اکیڈمی کے شیلڈ اسکول اور جدید تربیتی پروگرامات کے حوالے سے تفصیلی بریفنگ دی گئی، جس میں پولیس فورس میں جدید تقاضوں کے مطابق جدت اور پیشہ ورانہ صلاحیتوں کی بہتری کے اقدامات شامل تھے۔ سینئر پولیس افسران سے خطاب کرتے ہوئے فیلڈ مارشل نے اداروں کے درمیان مضبوط تعاون، اعلیٰ پیشہ ورانہ معیارات اور عوامی امن و امان کے تحفظ کے فروغ پر زور دیا۔
وزیر داخلہ محسن نقوی نے بھی اس موقع پر پولیس اہلکاروں کی قربانیوں کو خراج تحسین پیش کیا اور کہا کہ پاکستان کی افواج ہر وقت عوام کی حفاظت اور ملکی سلامتی کے تحفظ کے لیے چوکس اور مستعد ہیں۔