ڈیرہ اسماعیل خان: خیبرپختونخوا کے اضلاع ٹانک اور ڈیرہ اسماعیل خان میں سیکیورٹی فورسز نے دو مختلف کامیاب کارروائیوں کے دوران ‘فتنہ الخوارج’ سے تعلق رکھنے والے پانچ دہشت گردوں کو ہلاک کر دیا ہے۔ پاک فوج کے شعبہ تعلقات عامہ (آئی ایس پی آر) کے مطابق یہ دہشت گرد بھارتی سرپرستی میں ملک دشمن سرگرمیوں میں مصروف تھے۔
آئی ایس پی آر کی جانب سے جاری کردہ بیان کے مطابق، 7 اور 8 مئی 2026 کی درمیانی شب خفیہ اطلاعات کی بنیاد پر ٹانک اور ڈیرہ اسماعیل خان میں انٹیلی جنس بیسڈ آپریشنز کیے گئے۔ ضلع ٹانک میں سیکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس کے نتیجے میں فتنہ الخوارج کے 4 خارجی مارے گئے۔ دوسری کارروائی ضلع ڈیرہ اسماعیل خان میں کی گئی جہاں ایک اور دہشت گرد کو ہلاک کر دیا گیا۔
ہلاک ہونے والے دہشت گردوں کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد ہوا ہے۔ آئی ایس پی آر کے مطابق، ہلاک ہونے والے یہ خوارج علاقے میں سیکیورٹی فورسز پر حملوں، ٹارگٹ کلنگ اور بھتہ خوری جیسی متعدد دہشت گردانہ کارروائیوں میں براہ راست ملوث تھے۔
بیان میں مزید کہا گیا ہے کہ سیکیورٹی فورسز ملک سے دہشت گردی کی لعنت کو جڑ سے اکھاڑ پھینکنے کے لیے پرعزم ہیں۔ علاقے میں موجود دیگر ممکنہ دہشت گردوں کے خاتمے کے لیے ‘سینیٹائزیشن آپریشن’ اور کلیئرنس کی کارروائی تاحال جاری ہے۔ مقامی آبادی نے سیکیورٹی فورسز کی ان کامیاب کارروائیوں کو سراہتے ہوئے دہشت گردی کے خلاف جنگ میں بھرپور تعاون کا یقین دلایا ہے۔
دیکھئیے:ہنگو میں سکیورٹی فورسز کی بڑی کاروائی: فتنہ الخوارج کے 100 سے زائد دہشت گردوں کی دراندازی ناکام