راولپنڈی: جی ایچ کیو حملہ کیس میں بڑی پیش رفت سامنے آئی ہے،انسدادِ دہشت گردی عدالت نے 47 اشتہاری ملزمان کو دہشت گردی کے الزامات ثابت ہونے پر 10،10 سال قید اور 5،5 لاکھ روپے جرمانہ کی سزا سنا دی۔
سزا پانے والوں میں پاکستان تحریک انصاف سے تعلق رکھنے والے متعدد رہنما بھی شامل ہیں جن میں اعظم سواتی، عمر ایوب، زرتاج گل، شیخ رشید شفیق، کنول شوذب، مراد سعید، حماد اظہر، جمشید چیمہ اور مسرت جمشید چیمہ سمیت دیگر ملزمان شامل ہیں۔
عدالت نے اپنے فیصلے میں کہا کہ قانون سے فرار ہو کر انصاف کے عمل کو سبوتاژ نہیں کیا جا سکتا، لہٰذا تمام اشتہاری ملزمان کے خلاف قانونی کارروائی مکمل کرتے ہوئے انہیں سزا سنائی گئی ہے۔ عدالت نے سزا کے ساتھ ساتھ تمام ملزمان کی جائیداد ضبط کرنے کا بھی حکم دیا ہے۔
یاد رہے کہ 9 مئی 2023 کو ملک کے مختلف شہروں میں احتجاج کے دوران راولپنڈی میں جی ایچ کیو پر حملے کے واقعے کے بعد متعدد مقدمات درج کیے گئے تھے جن کی سماعت انسداد دہشت گردی عدالت میں جاری تھی۔ عدالت کے حالیہ فیصلے کو اس کیس میں ایک اہم پیش رفت قرار دیا جا رہا ہے۔
دیکھئیے:عادل راجہ پر انسداد دہشتگردی ایکٹ کے تحت پابندی عائد، نام فورتھ شیڈول میں شامل