اسلام آباد: وفاقی حکومت نے عالمی منڈی میں تیل کی بڑھتی قیمتوں کے اثرات سے عوام کو بچانے کیلئے بڑا اقدام اٹھاتے ہوئے آئل اینڈ گیس ریگولیٹری اتھارٹی (اوگرا) کو پرائس ڈیفرینشل کلیمز کی مد میں 27 ارب روپے کی پہلی قسط جاری کر دی ہے۔
وزارت خزانہ کے مطابق یہ فیصلہ وزیراعظم شہباز شریف کی ہدایات پر کیا گیا، جس کا مقصد عوام کو مہنگائی کے اضافی بوجھ سے تحفظ فراہم کرنا ہے۔
بیان میں کہا گیا ہے کہ جاری کیے گئے فنڈز وزیراعظم کے کفایت شعاری فنڈ سے فراہم کیے گئے ہیں، جو حکومتی اخراجات میں کمی اور مختلف بچت اقدامات کے تحت جمع کیے گئے۔
حکومتی ذرائع کے مطابق اس اقدام سے تیل کی قیمتوں میں اضافے کے اثرات کو محدود رکھنے میں مدد ملے گی، جبکہ مزید ریلیف دینے کیلئے اضافی کفایتی اقدامات پر بھی غور کیا جا رہا ہے۔
ماہرین کے مطابق عالمی سطح پر توانائی بحران کے تناظر میں یہ قدم عوام کو فوری ریلیف دینے اور مہنگائی کے دباؤ کو کم کرنے کی کوشش کا حصہ ہے۔
دیکھئیے:پی ایس ایل 11 کا آفیشل ترانہ جاری، عاطف اسلم کی آواز نے رنگ جما دیا