یورپی یونین کی جانب سے پاکستان کو حاصل جی ایس پی پلس تجارتی مراعات کے معاملے پر سیاست عروج پر پہنچ گئی ہے، جہاں ایک مخصوص بھارتی لابی پاکستان کا یہ درجہ ختم کرانے کے لیے سرگرم ہے۔
مبصرین کے مطابق گیری کارٹ رائٹ جیسے بھارت کے مالی تعاون اور حمایت سے کام کرنے والے لابیسٹ حقائق کو سیاق و سباق سے ہٹ کر پیش کر رہے ہیں اور من پسند اعداد و شمار کے ذریعے پاکستان کا منفی تاثر ابھارنے کی کوشش کر رہے ہیں، جبکہ اس پورے بیانیے میں بھارت کے اپنے سنگین ریکارڈ کو مکمل طور پر نظر انداز کیا جا رہا ہے۔
انسانی حقوق کی صورتحال
ماہرین کا کہنا ہے کہ سنگین انسانی اور ماحولیاتی خلاف ورزیوں کے باوجود بھارت خود یورپی یونین کی معیاری جی ایس پی تجارتی ترجیحات سے مستفید ہو رہا ہے، مگر اس کی حمایت یافتہ لابیز پاکستان کی جی ایس پی پلس شرائط پر سوال اٹھا رہی ہیں۔
رپورٹس کے مطابق بھارت میں اس وقت 11 ملین افراد جدید دور کی غلامی میں پھنسے ہوئے ہیں، جبکہ ملک بھر میں جبری مشقت، قرض کے بدلے غلامی اور انسانی اسمگلنگ بڑے پیمانے پر جاری ہے۔
اعداد و شمار سے ظاہر ہوتا ہے کہ 2024 میں بھارت میں خواتین کے خلاف زیادتی کے 29,536 اور دیگر جرائم کے 441,534 واقعات درج کیے گئے، جبکہ ملک میں فضائی آلودگی کی سطح عالمی ادارۂ صحت کے مقررہ معیار سے تقریباً 10 گنا زیادہ ریکارڈ کی گئی ہے۔
مقبوضہ کشمیر کی صورتحال
مقبوضہ جموں و کشمیر میں بھی بھارتی جبر کا سلسلہ جاری ہے، جہاں صرف 24 سے 27 اپریل 2025 کے دوران بے گناہ شہریوں کے کم از کم 9 مکانات مسمار کیے گئے۔
اس کے علاوہ بھارت میں مسلمانوں کی 861 مذہبی عمارتیں شہید کی گئیں جن میں 57 مساجد بھی شامل ہیں، جبکہ 2026 میں ریاستی اہلکاروں کے ہاتھوں کم از کم 27 مسلمان قتل کیے گئے جو 2022 کے بعد سب سے زیادہ تعداد ہے۔
اسی طرح جنوری سے ستمبر 2026 کے دوران نفرت انگیز جرائم کے 119 واقعات میں ریاستی عناصر کے ملوث ہونے کی نشاندہی کی گئی ہے، جہاں ملزمان کو ریاستی سرپرستی کے باعث قانونی تحفظ حاصل ہے۔
سرحد پار کارروائیاں
بھارت کی مبینہ سرحد پار جبر کی کارروائیاں شمالی امریکہ تک پھیل چکی ہیں اور جون 2023 میں کینیڈا میں ہردیپ سنگھ نجر کے قتل کا معاملہ عالمی سطح پر توجہ کا مرکز بنا رہا، جبکہ بشنوئی گینگ جیسے جرائم پیشہ گروہوں کی ریاستی نیٹ ورکس کے زیرِ سایہ سرگرمیوں پر بھی سوالات اٹھ رہے ہیں۔
تجزیہ کاروں کے مطابق بدعنوانی، ادارہ جاتی امتیازی سلوک اور عدالتی استثنیٰ جیسے سنگین مسائل سے دوچار بھارت کو چاہیے کہ وہ پاکستان کے خلاف جان بوجھ کر منفی ماحول پیدا کرنے کے بجائے پہلے اپنے داخلی حالات کی اصلاح کرے۔
