بلوچستان کے ضلع گوادر میں سکیورٹی فورسز نے دہشت گردی کی کوششیں ناکام بناتے ہوئے ایک بلوچ خاتون سمیت 10 حملہ آوروں کو ہلاک کر دیا۔ فائرنگ کے تبادلے میں ایک شہری بھی شہید ہوا، تاہم سکیورٹی فورسز کا کوئی اہلکار شہید نہیں ہوا۔
پاک فوج کے شعبۂ تعلقات عامہ (آئی ایس پی آر) کے مطابق، 22 اکتوبر کو بھارتی سرپرستی میں سرگرم دہشت گردوں نے گبد بارڈر کراسنگ اور گوادر شہر کے مختلف علاقوں میں حملوں کی کوشش کی۔
سکیورٹی فورسز نے دہشت گردوں کے عزائم ناکام بنانے اور شہریوں کی حفاظت کے لیے گوادر شہر اور گردونواح میں کلیئرنس آپریشنز کیے۔ مختلف جھڑپوں کے دوران 10 حملہ آور مارے گئے۔
حملے میں بلوچ خاتون بھی شامل
آئی ایس پی آر کے مطابق، حملہ آوروں میں ایک بلوچ خاتون بھی شامل تھی، جو کارروائی کے دوران ہلاک ہوگئی۔ فوجی ترجمان نے کہا کہ دہشت گرد تنظیمیں اپنے مقاصد کے لیے بلوچ خواتین کا استحصال کر رہی ہیں، جو بلوچ اور اسلامی روایات کے منافی ہے۔
آئی ایس پی آر کا کہنا ہے کہ حملوں اور جھڑپوں کے دوران چند گاڑیوں کو بھی نقصان پہنچا۔ کارروائیوں کے بعد علاقے میں امن و امان بحال کر دیا گیا۔
آئی ایس پی آر کے مطابق، بلوچستان کے عوام اپنے نام پر تشدد کرنے والے عناصر کو مسترد کرتے آئے ہیں۔ دہشت گردی کے خاتمے کے لیے قومی ایکشن پلان اور وفاقی ایپکس کمیٹی کے منظور کردہ وژن ’عزمِ استحکام‘ کے تحت کارروائیاں جاری رہیں گی۔
فوجی ترجمان نے کہا کہ سکیورٹی فورسز اور قانون نافذ کرنے والے ادارے بیرونی سرپرستی میں ہونے والی دہشت گردی کے خاتمے کے لیے پُرعزم ہیں۔
