کلاچی میں سی ٹی ڈی کا کامیاب آپریشن؛ ایک خارجی ہلاک، دو زخمی

کلاچی اور ملحقہ علاقوں میں خوارج کی موجودگی کی اطلاع پر پولیس اور محکمہ انسداد دہشت گردی (سی ٹی ڈی) نے انٹیلیجنس بیسڈ مشترکہ آپریشن کیا۔ ذرائع کے مطابق کارروائی کے دوران مشتبہ خوارج نے پولیس کو دیکھتے ہی فائرنگ شروع کر دی، جس پر پولیس اور سی ٹی ڈی اہلکاروں نے فوری اور بھرپور جوابی کارروائی کی۔

ذرائع کا کہنا ہے کہ شدید فائرنگ کے تبادلے کے بعد ایک خوارج موقع پر ہلاک جبکہ دو زخمی ہو گئے۔ مقابلے کے دوران ایک پولیس اہلکار بھی معمولی زخمی ہوا جسے فوری طبی امداد فراہم کی گئی۔

سیکیورٹی ذرائع کے مطابق ہلاک ہونے والا خوارج کھتی چیک سے تعلق رکھتا تھا اور پولیس پر حملوں سمیت ٹارگٹ کلنگ کی متعدد وارداتوں میں ملوث رہا ہے۔ کارروائی انٹیلیجنس اداروں کی بروقت اطلاع پر عمل میں لائی گئی، جس کے باعث ایک بڑے دہشت گردانہ منصوبے کو ناکام بنا دیا گیا۔

ہلاک دہشت گرد کے قبضے سے بھاری مقدار میں اسلحہ، ایمونیشن، دستی بم اور ایک موٹر سائیکل بھی برآمد کر لی گئی ہے۔ واقعے کے بعد پولیس نے علاقے کو مکمل طور پر گھیرے میں لے کر فرار ہونے والے زخمی دہشت گردوں کی تلاش شروع کر دی ہے جبکہ سرچ آپریشن جاری ہے۔

دیکھیں: معرکۂ حق میں کامیابی کے بعد پاکستان کے دفاعی ساز و سامان کی مانگ میں اضافہ: وزیراعظم