پاکستان میں غیر قانونی طور پر مقیم غیر ملکیوں کی واپسی کے سلسلے میں طورخم سرحد کے ذریعے افغان باشندوں کی اپنے وطن روانگی کا عمل دوسرے روز بھی جاری ہے۔ امیگریشن حکام کے مطابق گزشتہ روز 223 خاندانوں پر مشتمل 705 افراد کو طورخم کے راستے افغانستان ڈی پورٹ کیا گیا۔
حکام کا کہنا ہے کہ آج بھی غیر قانونی طور پر مقیم سینکڑوں افغان باشندے طورخم سرحد پر پہنچے، جنہیں پہلے حمزہ بابا ٹرانزٹ کیمپ منتقل کیا گیا۔ وہاں تمام ضروری قانونی کاروائی اور دستاویزات کی جانچ پڑتال مکمل کرنے کے بعد انہیں قافلوں کی صورت میں سرحد کی جانب روانہ کیا گیا۔
امیگریشن ذرائع نے مزید بتایا کہ طورخم سرحد پر کلیئرنس کا عمل مکمل ہونے کے بعد ان افراد کو باقاعدہ طور پر افغان حکام کے حوالے کیا جا رہا ہے۔ واپسی کے اس عمل کو پرامن اور منظم بنانے کے لیے سکیورٹی اور انتظامیہ کی جانب سے سخت انتظامات کیے گئے ہیں تاکہ سرحد پر کسی بھی قسم کی بد نظمی سے بچا جا سکے۔