بھارت نے افغانستان میں موجود کینسر کے مریضوں کے لیے انسانی ہمدردی کے تحت 18 اقسام کی ادویات فراہم کی ہیں۔ افغان وزارتِ صحت کے تفصیلی معائنے اور کنٹرول طریقہ کار مکمل ہونے کے بعد انہیں متعلقہ ہسپتالوں اور صحت مراکز میں منتقل کر دیا جائے گا، تاکہ ضرورت مند مریضوں تک بروقت رسائی ممکن ہو سکے۔
مذکورہ اقدام ایسے وقت میں سامنے آیا ہے جب افغانستان کا شعبۂ صحت عالمی پابندیوں اور مالی بحران کے باعث سنگین مشکلات سے گزر رہا ہے۔ بالخصوص کینسر جیسے مہلک مرض میں مبتلا افراد کے لیے ادویات کی قلت ایک بڑا مسئلہ بنا ہوا ہے۔ بھارت نے اس سے قبل بھی افغانستان کو گندم اور دیگر بنیادی ضروریات کی امداد فراہم کی ہے، جس سے خطے میں انسانی بنیادوں پر تعاون کا تسلسل برقرار ہے۔
ذرائع سے معلوم ہوا ہے کہ دونوں ممالک کے درمیان صحت کے شعبے میں مزید تعاون کے امکانات پر بات چیت جاری ہے، جس میں طبی آلات کی فراہمی، ہسپتالوں کی بحالی اور طبی عملے کی تربیت جیسے اقدامات شامل ہو سکتے ہیں۔
دیکھیں: دوحہ بحری دفاعی نمائش کی افتتاحی تقریب میں افغان چیف آف اسٹاف کی شرکت