بھارت اور انگلینڈ کے مابین ٹی ٹوئنٹی ورلڈکپ 2026 کا سیمی فائنل کرکٹ کی تاریخ کا ایک یادگار ترین مقابلہ ثابت ہوا، جس میں دونوں ٹیموں نے مجموعی طور پر 499 رنز بنا کر شائقین کو سنسنی خیز لمحات فراہم کیے۔ یہ ٹی ٹوئنٹی کرکٹ کی تاریخ میں رنز کا دوسرا سب سے بڑا مجموعہ ہے۔ بھارت نے 253 رنز بنا کر کسی بھی ناک آؤٹ میچ میں سب سے زیادہ رنز بنانے کا ریکارڈ اپنے نام کیا، جبکہ انگلینڈ کے 246 رنز اس فہرست میں دوسرے نمبر پر رہے۔
انفرادی کارکردگی میں انگلینڈ کے جیکب بیتھل نے 105 رنز کی شاندار اننگز کھیلی، جو ٹی ٹوئنٹی ورلڈکپ کے ناک آؤٹ مرحلے میں اب تک کا سب سے بڑا انفرادی اسکور ہے۔ دوسری جانب بھارت کے سنجو سیمسن نے 89 رنز بنا کر ٹی ٹوئنٹی ورلڈکپ کے ناک آؤٹ میچ میں کسی بھی بھارتی بلے باز کی جانب سے سب سے بڑی اننگز کھیلنے کا اعزاز حاصل کیا۔ باؤلنگ میں انگلینڈ کے جوفرا آرچر کے خلاف بھارتی بلے بازوں نے جارحانہ بیٹنگ کرتے ہوئے انہیں 7 چھکے رسید کیے، جو ورلڈکپ میں کسی ایک باؤلر کو ایک میچ میں لگنے والے چھکوں کا ریکارڈ برابر کرنے کے مترادف ہے۔
نئی تاریخ
اس میچ میں مجموعی طور پر 73 چوکے اور 34 چھکے لگے، جو کسی بھی ٹی ٹوئنٹی ورلڈکپ میچ میں سب سے زیادہ باؤنڈریز کا نیا ریکارڈ ہے۔ کامیابی کے ساتھ فائنل میں پہنچ کر بھارتی ٹیم ٹی ٹوئنٹی ورلڈکپ کی تاریخ میں چوتھی بار فائنل کھیلنے والی پہلی ٹیم بن گئی ہے، جس نے پاکستان، سری لنکا اور انگلینڈ کو پیچھے چھوڑ دیا ہے۔ مزید برآں، یہ ٹی ٹوئنٹی ورلڈکپ کی تاریخ میں پہلا موقع ہے کہ کوئی دفاعی چیمپئن ٹیم لگاتار فائنل میں رسائی حاصل کرنے میں کامیاب رہی ہے۔