ہندوستان کی ریاست مدھیہ پردیش کے ضلع ریوا میں ایک وحشیانہ واقعہ سامنے آیا ہے، جہاں ہیناؤتا گاؤں میں دو نچلی ذات کی خواتین کو زندہ دفن کرنے کی کوشش کی گئی۔ اس لرزہ خیز واقعے کی ویڈیو سوشل میڈیا پر وائرل ہونے کے بعد دُنیا بھر میں غم و غصے کی لہر دوڑ گئی ہے۔
رپورٹ کے مطابق یہ واقعہ اس وقت پیش آیا جب ایک ٹرک ڈرائیور نے مبینہ طور پر جان بوجھ کر ان خواتین پر بجری کی پوری کھیپ الٹ دی، جس کے نتیجے میں وہ مکمل طور پر ملبے تلے دب گئیں۔ عینی شاہدین کا کہنا ہے کہ خواتین کو بچانے کے لیے وہاں موجود دیہاتی فوری طور پر پہنچے اور اپنی مدد آپ کے تحت مٹی اور بجری کھود کر انہیں بحفاظت باہر نکالا۔
مقامی سماجی حلقوں کا کہنا ہے کہ یہ واقعہ نچلی ذات سے تعلق رکھنے والے افراد کے خلاف بڑھتے ہوئے تعصب اور تشدد کا عکاس ہے۔ خواتین کی زندگی تو بچ گئی، تاہم اس واقعے نے ایک بار پھر یہ ثابت کر دیا ہے کہ بھارت میں نچلی ذات کی خواتین اور کمزور طبقات آج بھی غیر محفوظ ہیں۔
پولیس نے واقعے کا نوٹس لیتے ہوئے تحقیقات کا آغاز کر دیا ہے، تاہم اب تک کسی بڑی گرفتاری کی اطلاع سامنے نہیں آئی۔ انسانی حقوق کی تنظیموں نے اس واقعے کی شدید مذمت کرتے ہوئے ذمہ داروں کے خلاف سخت قانونی کارروائی اور متاثرہ خواتین کو انصاف فراہم کرنے کا مطالبہ کیا ہے۔
دیکھیے: افغانستان میں 23 ہزار غیر ملکی جنگجوؤں کی موجودگی: روسی وزارتِ خارجہ نے رپورٹ جاری کردی