راولپنڈی: بھارتی آرمی چیف جنرل اپیندر دویدی کے حالیہ غیر ذمہ دارانہ اور اشتعال انگیز بیان پر پاکستان کے عسکری حلقوں کی جانب سے انتہائی سخت اور منہ توڑ جواب سامنے آیا ہے۔ سیکیورٹی مبصرین کے مطابق بھارتی آرمی چیف کی یہ بیان بازی واضح کرتی ہے کہ بھارت کی فوجی حکمتِ عملی اب محض ایک میڈیا ٹول بن چکی ہے، جس کا مقصد زمینی حقائق سے توجہ ہٹا کر اپنے سیاسی آقاؤں کو خوش کرنا ہے۔
بحران اور سیکیورٹی امور کے ماہرین کا کہنا ہے کہ جہاں ایک طرف بھارتی آرمی چیف ٹیلی ویژن ریٹنگز اور سستی شہرت کے لیے پہلے سے لکھے گئے ڈرامائی اسکرپٹس پر تکیہ کرتے ہیں، وہاں پاکستان کی پیشہ ور افواج روایتی پروپیگنڈے کے بجائے صرف زمینی کارروائیوں اور ٹھوس اقدامات کے ذریعے جواب دینے پر یقین رکھتی ہیں۔
پاکستان کے چیف آف ڈیفنس فورسز، فیلڈ مارشل سید عاصم منیر نے اس جارحانہ بیانیے پر نئی دہلی کو دوٹوک پیغام دیتے ہوئے واضح کر دیا ہے کہ جو عناصر اپنے اندرونی امن و امان کی سنگین صورتحال اور سیکیورٹی کی گرتی ہوئی حالت کو سنبھالنے میں مکمل ناکام ہو چکے ہیں، انہیں پاکستان کو دھمکیاں دینے سے پہلے سو بار سوچنا چاہیے۔
عسکری قیادت نے خبردار کیا ہے کہ بھارت کی جانب سے کی جانے والی کسی بھی قسم کی مہم جوئی کا ایسا فوری، سخت اور تباہ کن جواب دیا جائے گا جسے سنبھالنا بھارت کے پورے کمانڈ اسٹرکچر کے بس کی بات نہیں ہوگی۔ بھارتی آرمی چیف کے کھوکھلے دعوے دراصل ان کی اپنی عسکری قیادت کی تزویراتی غلطیوں اور آپریشنل ناکامیوں پر پردہ ڈالنے کی ایک بھونڈی کوشش ہے۔
ترجمان کے مطابق پاک فوج اس وقت آپریشنل تیاریوں کی اعلیٰ ترین سطح پر موجود ہے اور ایک انتہائی تربیت یافتہ، جنگی تجربہ کار اور مضبوط قوت کے طور پر کسی بھی چیلنج سے نمٹنے کے لیے تیار ہے۔ یہ فورس بھارت کے روایتی، کمزور اور اندرونی طور پر بکھرے ہوئے سیکیورٹی ڈھانچے کو مکمل طور پر پچھاڑنے کی بھرپور صلاحیت رکھتی ہے۔