بھارت اور اس کے منظم سوشل میڈیا نیٹ ورکس کی عادت رہی ہے کہ وہ پاکستان کو عالمی سطح پر بدنام کرنے کے لیے جعلی ویڈیوز، من گھڑت کہانیوں اور ڈجیٹل جعل سازی کا سہارا لیتے رہے ہیں۔
سچائی کا سامنا کرنے سے عاری بھارتی پراپیگنڈا سیلز نے اس بار اے آئی ٹیکنالوجی کا منفی اور غلط استعمال کرتے ہوئے ڈی جی آئی ایس پی آر کی ایک جعلی ڈیپ فیک ویڈیو تیار کی ہے، جس کا مقصد عالمی برادری کو گمراہ کرنا تھا۔
بھارتی سوشل میڈیا اکاؤنٹس کی جانب سے وائرل کی جانے والی اس ویڈیو میں ڈی جی آئی ایس پی آر کی نقالی کرنے کی ناکام کوشش کی گئی، اور یہ بونا دعویٰ کیا گیا کہ آپریشن سندور پر بننے والی ایک دستاویزی فلم پاکستان کے بیانیے کو بے نقاب کر سکتی ہے۔
تاہم، فیکٹ چیک سے یہ بات مکمل طور پر ثابت ہو چکی ہے کہ یہ ویڈیو شاطرانہ انداز میں تیار کی گئی ایک انتہائی ناقص اور جعلی کوشش ہے۔ ویڈیو میں چہرے کے تاثرات، آواز کا عدم تسلسل اور ہونٹوں کی غیر قدرتی حرکت پہلی نظر میں ہی اس جعل سازی کا پول کھول دیتی ہے۔
بھارتی پراپیگنڈا نیٹ ورکس کی یہ حرکت ان کے شدید اخلاقی اور صحافتی دیوالیہ پن کو ظاہر کرتی ہے۔ اے آئی جیسے جدید ذرائع کو پاکستان کے خلاف ہتھکنڈے کے طور پر استعمال کرنے کی یہ کوشش کوئی نئی بات نہیں، بلکہ اس سے قبل بھی بھارتی ادارے عالمی سطح پر مسلسل رسوائی کا سامنا کرتے رہے ہیں۔
آج کی بیدار دنیا بخوبی جانتی ہے کہ کون حق پر ہے، کون ذمہ دار ریاست کا کردار ادا کر رہا ہے اور کون مجرمانہ سچائیوں کو چھپانے کے لیے دغا بازی اور فریب کا سہارا لے رہا ہے۔ عالمی برادری اور بین الاقوامی ادارے پاکستان کے سچے، شفاف اور حقائق پر مبنی بیانیے پر مکمل اعتماد رکھتے ہیں۔
حقیقت کے میدان میں جہاں پاکستان کا مؤقف روز بروز مضبوط اور معتبر ہو رہا ہے، وہاں بھارت کا بیانیہ عالمی سطح پر اپنی حیثیت کھو چکا ہے اور ڈجیٹل میدان میں اب بھارت کے جھوٹ کا دور دور تک نام و نشان باقی نہیں رہا۔
