ایرانی وزیر خارجہ عباس عراقچی نے امریکہ اور اسرائیل کی جانب سے جاری جارحیت کے تناظر میں پاکستان کی اخلاقی اور سفارتی حمایت پر حکومتِ پاکستان اور عوام کا تہہ دل سے شکریہ ادا کیا ہے۔
اپنے پیغام میں ایرانی وزیر خارجہ نے پاکستان کے ساتھ یکجہتی کے جذبات کا اظہار کیا۔ عباس عراقچی نے اپنے بیان میں کہا کہ پاکستانی حکومت اور عوام کا اس مشکل گھڑی میں ایران کے ساتھ کھڑے ہونے پر شکر گزار ہوں۔
عباس عراقچی کا کہنا تھا کہ ایران اپنی خود مختاری، حاکمیت اور علاقائی سالمیت کے دفاع کے لیے پرعزم ہے۔ انہوں نے کہا کہ خطے میں امریکا اور اسرائیل کی جارحانہ پالیسیوں کے خلاف ایران پوری ثابت قدمی اور استقامت کے ساتھ میدان میں موجود ہے اور اپنے دفاع کے حق سے ہرگز دستبردار نہیں ہوگا۔
ایرانی وزیر خارجہ کا یہ بیان ایسے وقت میں سامنے آیا ہے جب خطے میں کشیدگی اپنے عروج پر ہے اور تہران مسلسل اپنی سلامتی کے لیے بین الاقوامی سطح پر حمایت حاصل کر رہا ہے۔ سفارتی ماہرین کے مطابق پاکستان کی جانب سے ایران کی علاقائی سالمیت کی حمایت خطے میں سفارتی تعلقات کے ایک نئے اور مستحکم باب کی عکاس ہے۔