امریکی حملوں کے بعد ایران نے جوابی کارروائی شروع کردی ہے۔ پاسدارانِ انقلاب نے اردن میں امریکی فوجی اڈے کو بیلسٹک میزائلوں سے نشانہ بنانے کا دعویٰ کیا ہے۔
پاسدارانِ انقلاب کے مطابق اردن میں امریکی میرینز کے اڈے کیمپ ٹِٹن کو بیلسٹک میزائل حملے کا نشانہ بنایا گیا۔ ایران نے یہ کارروائی امریکی حملوں کے جواب میں کی ہے۔
دوسری جانب اردن کی مسلح افواج نے بتایا کہ ایرانی حدود سے 13 بیلسٹک میزائل اردن کی فضائی حدود میں داخل ہوئے۔ اردنی فضائی دفاع نے ان میں سے 10 میزائل مار گرائے، جبکہ 3 میزائل آبادی سے دور غیر آباد علاقوں میں جا گرے۔
اردنی حکام کے مطابق میزائل حملے میں کسی جانی نقصان کی اطلاع نہیں ملی۔ متاثرہ علاقوں میں خصوصی ٹیمیں بھیج دی گئی ہیں تاکہ میزائلوں کے ملبے اور دیگر نقصانات کا جائزہ لیا جا سکے۔
ایرانی حکام نے امریکی حملوں کے جواب میں مزید کارروائیوں کا عندیہ بھی دیا ہے۔ پاسدارانِ انقلاب کا کہنا ہے کہ خطے میں امریکی فوجی تنصیبات کو نشانہ بنایا جاتا رہے گا۔
یہ حملہ ایسے وقت میں ہوا ہے جب امریکا نے ایران میں پاسدارانِ انقلاب سے متعلق فوجی اہداف پر تازہ فضائی حملے کیے ہیں۔ امریکی سینٹرل کمانڈ کے مطابق ان حملوں میں فضائی دفاعی نظام، ریڈار، بحری اثاثے، مواصلاتی مراکز اور بارودی سرنگیں بچھانے کی صلاحیت رکھنے والے نظاموں کو نشانہ بنایا گیا۔
دیکھیے: ٹرمپ کی اردن میں کارروائی کے جواب میں ایران پر شدید حملوں کی دھمکی
