نائب وزیراعظم اور وزیر خارجہ اسحاق ڈار نے اقوامِ متحدہ کے سیکریٹری جنرل انتونیو گوتریس سے ٹیلی فونک رابطہ کیا ہے، جس میں مغربی ایشیا کی مجموعی صورتحال اور عالمی امن و سلامتی پر اس کے اثرات پر تفصیلی مشاورت کی گئی۔
گفتگو کے دوران اسحاق ڈار نے علاقائی تنازعات کے حل اور جنگ کی روک تھام کے لیے اقوامِ متحدہ کے کلیدی کردار کی اہمیت کا ذکر کیا۔ انہوں نے واضح کیا کہ پاکستان خطے میں پائیدار امن کے قیام کے لیے سفارت کاری اور بامقصد مذاکرات کی پالیسی پر سختی سے کاربند ہے۔
اس موقع پر اقوام متحدہ کے سیکریٹری جنرل انتونیو گوتریس نے خطے میں استحکام کے لیے پاکستان کی سفارتی کوششوں کو سراہا اور امن کی بحالی کے لیے جاری اقدامات کی مکمل حمایت کا یقین دلایا۔ اسحاق ڈار نے اس گفتگو کو انتہائی مفید قرار دیتے ہوئے اس عزم کا اعادہ کیا کہ پاکستان عالمی برادری کے ساتھ مل کر امن و سلامتی کے اہداف کے حصول کے لیے اپنا فعال کردار ادا کرتا رہے گا۔