وفاقی دارالحکومت اسلام آباد کی سکیورٹی صورتحال کے حوالے سے افغان پراپیگنڈا سوشل میڈیا اکاؤنٹ ‘اسلام آباد پوسٹ’ کی جانب سے ایک بار پھر من گھڑت اور گمراہ کن مہم جوئی کی گئی ہے۔ مذکورہ اکاؤنٹ نے سوشل میڈیا پر یہ بے بنیاد دعویٰ کیا ہے کہ اسلام آباد کی ایک مصروف شاہراہ سے بارودی مواد برآمد ہوا ہے، جس کے بعد انتظامیہ نے فوری کاروائی کرتے ہوئے ہر قسم کی نقل و حمل اور بالخصوص بھاری مال بردار گاڑیوں کے داخلے پر سخت پابندی عائد کر دی ہے۔
سکیورٹی ذرائع کے مطابق یہ تمام تر دعوے حقائق کے منافی اور دشمن عناصر کی اس منظم مہم کا حصہ ہیں جس کا مقصد پاکستان کے پرامن حالات کو سبوتاژ کرنا اور شہریوں میں بے چینی و عدم تحفظ کا احساس پیدا کرنا ہے۔
سوشل میڈیا پر وائرل ہونے والی اس خبر میں کسی بھی مستند سرکاری ذریعے کا حوالہ نہیں دیا گیا، اور نہ ہی وفاقی پولیس یا انتظامیہ کی جانب سے ایسی کسی کاروائی یا پابندی کی تصدیق کی گئی ہے۔
سکیورٹی ذرائع کا کہنا ہے کہ افغان سر زمین سے چلنے ہونے والے ایسے مخصوص سوشل میڈیا ہینڈلز مسلسل پاکستان کے خلاف زہریلا پروپیگنڈا کرنے میں مصروف ہیں تاکہ بین الاقوامی سطح پر ملک کے سیکیورٹی امیج کو نقصان پہنچایا جا سکے۔
شہریوں کو ہدایت کی گئی ہے کہ وہ ایسی غیر تصدیق شدہ اور من گھڑت خبروں پر کان دھرنے کے بجائے صرف سرکاری ذرائع سے جاری ہونے والی معلومات پر یقین کریں۔