اسلام آباد کے تھانہ سنگجانی کی حدود میں پولیس ناکہ بندی کے دوران بامسلح ڈکیت گینگ نے پولیس ٹیم پر اندھا دھند فائرنگ کر دی۔ پولیس کی بروقت کارروائی کے نتیجے میں دو ڈاکو زخمی حالت میں گرفتار کر لیے گئے، جبکہ ان کے دیگر ساتھی رات کے اندھیرے کا فائدہ اٹھاتے ہوئے فرار ہو گئے۔
پولیس ذرائع کے مطابق چیکنگ کے دوران دو موٹر سائیکلوں پر سوار چار مشتبہ بامسلح ملزمان کو روکنے کی کوشش کی گئی، تاہم ملزمان نے رکنے کے بجائے فرار ہونے کی کوشش کی۔ پولیس ٹیم نے جرات اور بہادری کا مظاہرہ کرتے ہوئے ملزمان کا تعاقب کیا، جس پر ملزمان نے پولیس کو اپنی طرف آتا دیکھ کر سیدھی فائرنگ شروع کر دی۔
پولیس اہلکار حفاظتی اقدامات اور بلٹ پروف جیکٹس کی بدولت محفوظ رہے، تاہم ملزمان کی فائرنگ سے سرکاری گاڑی کو مختلف سمتوں سے گولیاں لگنے کے باعث نقصان پہنچا۔ فائرنگ کے تبادلے کے بعد دو ملزمان اپنے ہی ساتھیوں کی فائرنگ سے زخمی حالت میں پائے گئے، جنہیں گرفتار کر لیا گیا۔ گرفتار ملزمان کی شناخت واجد اور سمیع اللہ کے نام سے ہوئی ہے۔
پولیس نے گرفتار ملزمان کے قبضے سے چھینے گئے تین قیمتی موبائل فون، دو موٹر سائیکلیں، 65 ہزار روپے نقدی اور وارداتوں میں استعمال ہونے والا اسلحہ دو پستول بمعہ ایمونیشن برآمد کر لیا۔ پولیس کے مطابق گرفتار ملزمان سنگین نوعیت کے جرائم کے متعدد مقدمات میں اسلام آباد پولیس کو مطلوب تھے۔
واقعے کے بعد فرار ہونے والے ساتھی ملزمان کی گرفتاری کے لیے سرچ آپریشن جاری ہے، جبکہ مزید تفتیش کا عمل بھی جاری ہے۔