تل ابیب: اسرائیلی فوج میں بنکرز کی کمی اور میزائل حملوں کے خطرے کے باعث بعض اہلکاروں نے ڈیوٹی انجام دینے سے انکار کر دیا، جبکہ سکیورٹی انتظامات پر سوالات اٹھنے لگے ہیں۔
اسرائیلی میڈیا کے مطابق رضاکار فوجیوں نے راکٹ اور میزائل حملوں سے ناکافی تحفظ پر تشویش ظاہر کرتے ہوئے پوسٹنگ پر رپورٹ کرنے سے انکار کیا۔ ان کا کہنا ہے کہ بار بار مطالبات کے باوجود بنکرز کی فراہمی لاجسٹک مسائل کے نام پر مؤخر کی جا رہی ہے۔
ایک اہلکار نے صورتحال کو خطرناک قرار دیتے ہوئے کہا کہ سائرن بجنے پر وہ صرف ہیلمٹ پہن کر خود کو بچانے کی کوشش کرتے ہیں۔ ایک اور فوجی کے مطابق اگر کوئی زخمی ہو جائے تو اس کا ازالہ ممکن نہیں۔
اہلکاروں نے طنزیہ انداز میں کہا کہ جو فوج دور دراز اہداف کو نشانہ بنانے کی صلاحیت رکھتی ہے، وہ اپنے سپاہیوں کو بنیادی تحفظ فراہم کرنے میں ناکام دکھائی دیتی ہے۔
تجزیہ کاروں کے مطابق یہ صورتحال اسرائیلی فوج کے اندرونی چیلنجز اور جنگی دباؤ کو ظاہر کرتی ہے، جہاں سکیورٹی خدشات اہلکاروں کے حوصلے پر اثر انداز ہو رہے ہیں۔
دیکھئیے:ایران نے مبینہ موساد جاسوس کو پھانسی دے دی، حساس معلومات فراہم کرنے کا الزام