صوبہ خیبر پختونخوا کے قبائلی ضلع خیبر کے علاقے آدم خیل میں سکیورٹی فورسز نے رات گئے ایک کامیاب کارروائی کے دوران 5 دہشت گردوں کو ہلاک اور متعدد کو زخمی کر دیا۔ مقامی سکیورٹی ذرائع کے مطابق یہ آپریشن دہشت گردوں کی موجودگی کی خفیہ اطلاع پر کیا گیا، جس میں بھاری ہتھیاروں اور گولہ باری کا استعمال بھی کیا گیا۔
ذرائع کا کہنا ہے کہ سکیورٹی فورسز نے دہشت گردوں کے مخصوص ٹھکانوں کو نشانہ بنایا جہاں مطلوب شدت پسند روپوش تھے۔ کاروائی کے دوران شدید فائرنگ کے تبادلے میں پانچ دہشت گرد ہلاک ہوئے جن کی شناخت کمانڈر حنظلہ، ناہید اللہ عرف حیات، اجمل، بہادر عرف مہاجر اور ابو دردا کے ناموں سے ہوئی ہے۔ ان میں ملنگ عرف سنگری نامی دہشت گرد بھی ہلاک ہونے والوں میں شامل ہے۔
اس آپریشن میں 7 دہشت گرد زخمی بھی ہوئے ہیں، جن میں یاسر عرف مہاجر، عبیدہ عرف جانان اور ایک افغان باشندہ بھی شامل ہے۔ کارروائی کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے تاکہ کسی بھی ممکنہ خطرے کا مکمل خاتمہ کیا جا سکے۔