پاکستان کی سرکاری تیل و گیس کمپنی (او جی ڈی سی ایل) نے خیبر پختونخوا کے ضلع کوہاٹ میں واقع نشپا بلاک سے تیل اور گیس کے نئے اور بڑے ذخائر دریافت کرنے کا اعلان کیا ہے۔ کمپنی نے اس اہم پیش رفت کے حوالے سے پاکستان اسٹاک ایکسچینج کو باضابطہ طور پر آگاہ کر دیا ہے۔
او جی ڈی سی ایل کے مطابق نشپا بلاک کے ‘برگزئی ایکس ون’ کنویں سے یومیہ 3 ہزار 765 بیرل خام تیل حاصل ہونے کی توقع ہے، جبکہ اسی کنویں سے یومیہ ایک کروڑ 12 لاکھ مکعب فٹ گیس بھی دستیاب ہوگی۔ اس بڑی دریافت کے لیے کمپنی نے 5 ہزار 170 میٹر کی ریکارڈ گہری کھدائی کی، جس کے کامیاب نتائج برآمد ہوئے ہیں۔
ماہرین کا کہنا ہے کہ اس نئی دریافت سے نہ صرف ملک میں جاری توانائی کے بحران پر قابو پانے میں مدد ملے گی بلکہ نشپا بلاک میں مزید ذخائر کی تلاش کے امکانات بھی روشن ہو گئے ہیں۔ واضح رہے کہ او جی ڈی سی ایل 65 فیصد حصص کے ساتھ اس بلاک کی آپریٹر ہے، جبکہ پاکستان پٹرولیم لمیٹڈ کے 30 فیصد اور جی ایچ پی ایل کے 5 فیصد حصص اس منصوبے میں شامل ہیں۔
دیکھیے: یانبو بندرگاہ سے تیل کی فراہمی: پاکستان اور سعودی عرب کے درمیان ہنگامی معاشی تعاون کا معاہدہ